Тошкент метрополитенида поездлар оралиғи қисқартирилади

Тошкент, Ўзбекистон (UzDaily.uz) — Тошкент метрополитени янги ўқув йили бошланиши билан барча йўналишларда тиғиз вақтларда поездлар ҳаракати оралиғини қисқартиради. Бу чоралар таълим муассасаларида дарслар бошланиши ортидан йўловчилар оқими кўпайиши кутилayotgani билан боғлиқ. Бу ҳақда Тошкент метрополитени матбуот хизмати хабар берди.

Хусусан, янги ўқув йилидан бошлаб Тошкентдаги барча олий таълим муассасаларида биринчи смена дарслари соат 08:00 да бошланади. Шу муносабат билан метрополитен эрталабки ва кечки тиғиз вақтларда жамоат транспортига тушадиган юклама ошишига тайёргарлик кўрмоқда.

Чилонзор йўналишида поездлар 1,5–2 дақиқалик интервал билан ҳаракатланади, Ўзбекистон йўналишида эса поездлар оралиғи уч дақиқагача қисқартирилади. Юнусобод йўналишида интервал тўрт дақиқагача, Ер усти ҳалқа йўналишида эса 7–8 дақиқани ташкил этади.

Метрополитенда янги ўқув йилида йўловчиларга қулай, хавфсиз ва сифатли хизмат кўрсатишни таъминлаш мақсадида йўловчилар оқими кўпайишига тайёргарлик ишлари ҳам олиб борилмоқда.

Бундан ташқари, 2026 йил давомида Тошкент метрополитени ҳаракат таркибини 14 та замонавий поезд таркиби билан тўлдириш режалаштирилган. Ҳозирга қадар Ўзбекистонга 11 та поезд етказиб берилган, яна учта поезд таркиби яқин кунларда келиши кутилмоқда.