Камилла Раҳимова US Open мусобақасида Крейчиковани мағлуб этди
Тошкент, Ўзбекистон (UzDaily.uz) — Ўзбекистон вакили Камилла Раҳимова АҚШ Очиқ теннис чемпионатининг иккинчи босқичига йўл олди. У старт учрашувида чехиялик теннисчи Барбора Крейчиковани 7:6, 6:2 ҳисобида мағлуб этди. Мусобақа бошланган пайтда Крейчикова WTA рейтингида 27-ўринни, Раҳимова эса 88-ўринни эгаллаган эди.
Биринчи сет теннисчиларнинг тенг кураши остида ўтди ва тай-брейк билан якунланди. Раҳимова тай-брейкда 7:4 ҳисобида ғалаба қозониб, учрашувда олдинга чиқди.
Иккинчи партияда Ўзбекистон вакили устунликни қўлга киритди ва учрашувни 6:2 ҳисобида ғалаба билан якунлади. Баҳс 1 соат 53 дақиқа давом этди.
Бу Раҳимованинг WTA турнирларида Крейчиковага қарши ўтказган икки ўзаро учрашувдаги биринчи ғалабаси бўлди. Ушбу муваффақият эвазига ўзбек теннисчиси кетма-кет учинчи марта «Катта дубулға» турнирининг иккинчи босқичига чиқди.
US Open’нинг иккинчи босқичида Раҳимова япониялик Аои Ито ва Испания вакили Оксана Селехметева ўртасидаги учрашув ғолибига қарши майдонга тушади. Уларнинг баҳси 31 август кунига режалаштирилган.
31 август, душанба куни яна бир Ўзбекистон вакили Мария Тимофеева ҳам мусобақадаги иштирокини давом эттиради. Унинг рақиби словениялик Тамара Зиданшек бўлади. Учрашув мусобақанинг иккинчи куни тақвимига киритилган.
