Тошкент ҳокимлиги Глинка кўчасидаги авариянинг дастлабки сабабини маълум қилди

Тошкент, Ўзбекистон (UzDaily.uz) —  Тошкент ҳокимлиги Глинка кўчасида юзага келган авариявий ҳолатнинг дастлабки сабабини маълум қилди. Дастлабки маълумотларга кўра, диаметри 219 мм бўлган ер ости газ қувуридан сизиб чиққан газ иссиқлик тармоқлари камерасида тўпланган ва бу ҳодисага сабаб бўлган.

Текширувлар давомида газ қувурининг тахминан 375 кв. см майдонли қисмида сизиб чиқишнинг бир нечта нуқтаси аниқланган. Шикастланган участка ўлчами 15×25 см ни ташкил этган.

Айни пайтда соҳа мутахассислари газ сизишининг сабаблари ва ҳодисанинг барча ҳолатларини ўрганишда давом этмоқда. Ҳокимликда таъкидланишича, нафақат авария оқибатларини бартараф этиш, балки бундай ҳолатлар такрорланишининг олдини олиш мақсадида муҳандислик тармоқларининг ҳолатини ҳам текшириш муҳим.

Текширув ишлари якунланганидан сўнг йўл қопламасини тиклаш ишлари давом эттирилади. Яқин вақт ичида йўлнинг мазкур қисми транспорт ҳаракати учун қайта очилиши кутилмоқда.

Ҳодиса юзасидан жиноят иши қўзғатилган ва тергов ҳаракатлари олиб борилмоқда. Тергов натижаларига кўра, айбдор шахсларнинг ҳаракатларига ҳуқуқий баҳо берилади.

Тошкент ҳокимлиги маълум қилишича, вазият шаҳар ҳокимияти томонидан доимий назоратда қолмоқда.