Тошкент, Ўзбекистон (UzDaily.uz) — 2026 йилнинг биринчи ярмида Ўзбекистонда 373,4 мингта туғилиш қайд этилди. 2025 йилда бу кўрсаткич 879,6 мингтани ташкил этган бўлса, 1991 йилдан буёнги даврда энг юқори натижа 2023 йилда кузатилиб, 962 мингтага етган. Бу ҳақда Миллий статистика қўмитаси маълум қилди.
Тақдим этилган маълумотларга кўра, 1991 йилда мамлакатда 723,4 мингта туғилиш қайд этилган. 1995 йилга келиб бу кўрсаткич 678 мингтагача камайган, 2000 йилда эса 527,6 мингтани ташкил этган. Бу статистикада келтирилган йиллар орасидаги энг паст кўрсаткич ҳисобланади.
Кейинги йилларда туғилишлар сони кўпайиб борган. 2005 йилда 533,5 мингта, 2010 йилда 634,8 мингта, 2015 йилда эса 734,1 мингта туғилиш қайд этилган. 2020 йилда ушбу кўрсаткич 841,8 мингтага етган.
2021 йилда Ўзбекистонда 905,2 мингта, 2022 йилда 932,2 мингта туғилиш қайд этилган. 2023 йилда туғилишлар сони 962 мингтага етиб, энг юқори кўрсаткични ташкил қилган. Шундан сўнг пасайиш кузатилган: 2024 йилда туғилишлар сони 926,4 мингта, 2025 йилда эса 879,6 мингта бўлган.
Шундай қилиб, келтирилган маълумотлар 1990-йилларда туғилишлар сони камайганини, кейинги йилларда ўсиш кузатилганини ва 2023 йилдаги энг юқори кўрсаткичдан сўнг пасайиш бошланганини кўрсатади.
