Тошкент, Ўзбекистон (UzDaily.uz) — Фарғона вилоятида «Умра» зиёратини ноқонуний ташкил этишга уринишнинг олди олинди.
Данғара туманидаги сайёҳлик компанияси ходими тегишли лицензияга эга бўлмаган ҳолда тўрт нафар фуқарони Саудия Арабистонига юбориш учун 4 400 доллар талаб қилган. Бу ҳақда Ўзбекистон Давлат хавфсизлик хизмати хабар берди.
Тезкор тадбир ДХХнинг Фарғона вилояти бўйича бошқармаси ходимлари томонидан вилоят ички ишлар бошқармаси билан ҳамкорликда ўтказилди. Сайёҳлик компанияси ходими ашёвий далиллар билан ушланган.
Ҳуқуқни муҳофаза қилувчи органлар маълумотига кўра, эркак тўрт нафар фуқарони «Умра» зиёратини адо этиш учун сафарини ташкил этиш эвазига 4 400 доллар талаб қилган. У олдиндан тўлов сифатида 1 100 доллар олган.
Бунда сайёҳлик компанияси ходимида «Умра» зиёратини ташкил этиш учун тегишли лицензия бўлмаган.
Қўлга олинган шахсга нисбатан жиноят иши қўзғатилди. Айни пайтда тергов ҳаракатлари олиб борилмоқда.
Ҳуқуқни муҳофаза қилувчи органлар фуқароларни бундай ҳуқуқбузарликлар ҳақида ДХХнинг 1520 қисқа рақами орқали хабар беришга чақирди. Ариза берувчиларнинг шахси махфийлиги кафолатланади.
