Тошкент, Ўзбекистон (UzDaily.uz) — Кутилаётган ёғингарчиликлар муносабати билан 11–12 октябрь кунлари Ўзбекистоннинг тоғ олди ва тоғли ҳудудларида сел ва тошқин ҳодисалари юзага келиши мумкин. Айрим ҳудудларда ерларни сув босиши ҳам прогноз қилинмоқда. Бу ҳақда Ўзгидромет хабар берди.
Прогноз қилинаётган ёғингарчиликлар муносабати билан мазкур ҳудудларда яшовчи аҳоли ва ташриф буюрувчилардан эҳтиёт чораларига риоя қилиш сўралди.
Огоҳлантириш мамлакатнинг тўққизта вилоятидаги айрим ҳудудларга тааллуқли.
Тошкент вилоятида Оҳангарон, Бўстонлиқ, Паркент, Пискент, Ўртачирчиқ ва Юқоричирчиқ туманлари, шунингдек, Ангрен ва Олмалиқ шаҳарларида сел ва тошқин хавфи юзага келиши мумкин.
Самарқанд вилоятида Ургут, Самарқанд, Булунғур, Нуробод, Қўшработ, Каттақўрғон, Пайариқ, Жомбой ва Иштихон туманлари эҳтимолий хавф зонасига киради.
Жиззах вилоятида огоҳлантириш Зомин, Бахмал, Ғаллаорол, Шароф Рашидов, Фориш ва Янгиобод туманларига тааллуқли.
Наманган вилоятида Пап, Косонсой, Чортоқ, Чуст, Наманган ва Янгиқўрғон туманларида сел ва тошқин ҳодисалари юзага келиши мумкин. Фарғона вилоятида эса рўйхатга Сўх, Шоҳимардон, Фарғона ва Бешариқ туманлари киритилган.
Андижон вилоятида огоҳлантириш Андижон, Асака, Жалолқудуқ, Қўрғонтепа, Пахтаобод, Избоскан, Хўжаобод ва Марҳамат туманлари, шунингдек, Хонобод шаҳрига тааллуқли.
Навоий вилоятида Хатирчи, Навбаҳор, Нурота, Конимех ва Кармана туманларида ноқулай ҳодисалар юзага келиши мумкин.
Қашқадарё вилоятида рўйхатга Яккабоғ, Деҳқонобод, Чироқчи, Китоб, Шаҳрисабз, Қамаши ва Ғузор туманлари киритилган.
Сурхондарё вилоятида огоҳлантириш Сариосиё, Узун, Олтинсой, Денов, Бойсун, Шеробод, Шўрчи, Қумқўрғон ва Музработ туманларига тааллуқли.
