Тошкент, Ўзбекистон (UzDaily.uz) — Фарғона вилояти ҳокими Хайрулло Бозоров UZKORO компанияси раҳбари Пэк Сон Квон билан учрашув ўтказди. Унда томонлар таълим соҳасидаги ҳамкорликни кенгайтириш ва қўшма инвестиция лойиҳаларини амалга ошириш масалаларини муҳокама қилди.
Учрашувда, шунингдек, вилоят таълим муассасаларида замонавий технологияларни жорий этиш масалаларига ҳам алоҳида эътибор қаратилди.
Хайрулло Бозоров Ўзбекистон Президентининг яқинда Корея Республикасига амалга оширган давлат ташрифи икки томонлама ҳамкорликка янги суръат бағишлаганини таъкидлади.
Унинг сўзларига кўра, икки мамлакат ўртасидаги муносабатларнинг ривожланиши минтақалараро алоқаларни кенгайтириш ва кореялик инвесторлар иштирокида Фарғона вилоятида янги лойиҳаларни амалга ошириш учун қўшимча имкониятлар яратмоқда.
Учрашув давомида UZKORO компаниясининг вилоятдаги фаолияти ҳақида маълумот берилди. Хусусан, компания Кореянинг SNC Co., Ltd. компанияси томонидан ишлаб чиқарилган ҳашаротлар ва вируслардан ҳимоя қилувчи воситаларни Фарғона шаҳридаги тўққизта таълим муассасасига беғараз ўрнатиш лойиҳасини амалга оширишни бошлади.
Томонлар кейинги босқичда бундай ишлар янада кенг кўламда давом эттирилишини таъкидлади.
Учрашув иштирокчилари қўшма лойиҳаларни амалга ошириш масалалари юзасидан ҳам фикр алмашди.
Музокаралар якунида Фарғона вилояти ва UZKORO компанияси ўртасида ҳамкорлик меморандуми имзоланди.
