Тошкент ҳокими ҳайвонларга меҳр-шафқат билан муносабатда бўлишга чақирди

Тошкент, Ўзбекистон (UzDaily.uz) — Тошкент шаҳри ҳокими Шавкат Умурзаков ҳайвонларга нисбатан шафқатсиз ва масъулиятсиз муносабат ҳолатлари кўпайиб бораётганидан жиддий хавотир билдириб, қаровсиз ҳайвонлар билан ишлашнинг замонавий тизимини яратиш бўйича ишларни амалий босқичга ўтказиш ниятида эканини маълум қилди. Бу ҳақда пойтахт ҳокимлиги матбуот хизмати хабар берди.

Ҳокимлик таъкидлашича, ҳайвонларга нисбатан зўравонлик ҳолатлари ҳақидаги хабарлар деярли ҳар куни учрамоқда. Шаҳар маъмурияти фикрича, сўнгги воқеалар бундай ҳолатларга нафақат тезкор муносабат билдириш, балки жамиятда меҳр-шафқат, масъулият ва барча тирик мавжудотга ҳурмат маданиятини изчил шакллантириш зарурлигини яна бир бор тасдиқлади.

Маъмуриятда қайд этилишича, меҳрибонлик, раҳм-шафқат ва ожизларга ғамхўрлик қилиш ҳар доим Ўзбекистон халқига хос фазилат бўлиб келган. Ҳайвонларга нисбатан шафқатсиз муносабат миллий анъана ва қадриятларга зид ҳисобланади. Шунингдек, ўзини мустақил ҳимоя қила олмайдиган мавжудотларга бўлган муносабат жамиятнинг маънавий даражасини кўрсатувчи муҳим мезон экани таъкидланди.

Ушбу вазифаларни амалга ошириш мақсадида Тошкент шаҳар ҳокими аппарати раҳбари Шоҳрух Мамаджанов, «Ҳаёт» дайди итлар бошпанаси асосчиси Ирода Маткаримова, шунингдек, ободонлаштириш соҳаси ва қаровсиз ҳайвонларни тутиш хизмати вакиллари иштирокида ишчи йиғилиш ўтказилди.

Ҳокимлик маълум қилишича, гап фақат итлар учун ихтисослаштирилган бошпана қуриш ҳақида эмас, балки ҳайвонларни инсонпарварлик тамойиллари асосида тутиш, ветеринария кўригидан ўтказиш, эмлаш, стерилизация қилиш, даволаш, вақтинча сақлаш ва улар учун янги эгалар топишни ўз ичига олган комплекс тизимни яратиш ҳақида бормоқда.

Лойиҳани амалга оширишга соҳа мутахассислари, ветеринарлар, жамоат ташкилотлари ва волонтёрлар ҳамжамияти вакилларини жалб қилиш режалаштирилган.

Шаҳар маъмурияти, шунингдек, аҳоли, уй ҳайвонлари эгалари ва жамоат ташкилотларини ҳайвонларга масъулиятли муносабатни шакллантиришга фаол ҳисса қўшишга, шафқатсизлик ҳолатларига бефарқ бўлмасликка ҳамда уларни ҳимоя қилишга қаратилган ташаббусларни қўллаб-қувватлашга чақирди.

Ҳокимликда таъкидланишича, Тошкент ҳам аҳоли, ҳам ҳайвонлар учун хавфсиз ва қулай шаҳар бўлиши керак. Шунингдек, шаҳар аҳолиси фаровонлиги уй ҳайвонлари ва қаровсиз ҳайвонларга инсонпарвар муносабат билан чамбарчас боғлиқ экани қайд этилди.