Тошкент, Ўзбекистон (UzDaily.uz) — «Тошкент» Республика фонд биржасида 28 сентябрь куни хорижий валютада номиналланган облигациялар савдоси бошланди. Котировка рўйхатига Asia Alliance Bank ва Universalbankнинг умумий қиймати 30 млн долларлик облигациялари киритилди. Бу ҳақда биржа матбуот хизмати хабар берди.
Asia Alliance Bank 10 сентябрь куни Ўзбекистондаги биринчи валютали корпоратив облигациялар чиқарилишини рўйхатдан ўтказди. Банк ҳар бирининг номинал қиймати 100 доллардан бўлган 200 мингта облигация жойлаштиради.
Қимматли қоғозлар биржада AAB1B3U тикери остида муомалага чиқарилган. Уларнинг муомала муддати 1095 кун, яъни уч йилни ташкил этади. Купон ставкаси йиллик 7 фоиз миқдорида белгиланган бўлиб, тўловлар ҳар чоракда амалга оширилади.
Universalbank ҳар бирининг номинал қиймати 100 доллардан бўлган 100 мингта валютали облигация жойлаштирди. Биржада улар UNVB1B2U тикери остида тақдим этилган.
Universalbank облигациялари бўйича купон ставкаси йиллик 8,5 фоизни ташкил этади ва даромад ҳар чоракда бир марта тўланади. Муомала муддати 730 кун, яъни икки йилдан иборат.
Янги молиявий инструментлар Капитал бозорини ривожлантириш агентлиги томонидан апрель ойида валютали облигациялар муомаласи тўғрисидаги низом тасдиқланганидан сўнг бозорда пайдо бўлди. Ҳужжат капитал бозоридаги тартибга солувчи «қумдон» доирасида хорижий валютада номиналланган облигацияларни чиқариш, жойлаштириш, муомалага киритиш ва сўндириш қоидаларини белгилайди.
Низомга кўра, бир компаниянинг муомаладаги валютали облигацияларининг умумий ҳажми 50 млн доллардан ошмаслиги керак. Таъминланмаган облигацияларни эмитентнинг ўз капитали доирасида чиқаришга рухсат берилади.
Агар чиқарилган облигациялар ҳажми ўз капиталидан ошиб кетса, юқори кредит рейтингига эга бўлган айрим банклар бундан мустасно, компания белгиланган чегарадан ошган сумма миқдорида таъминот тақдим этиши керак.
Таъминот сифатида кўчмас мулк, пул маблағлари, банк кафолатлари ва суғурта полисларидан фойдаланиш мумкин.
Кўчмас мулк дастлаб бозор қиймати бўйича баҳоланиши лозим. Бунда у чиқарилишнинг баҳоланган қийматининг кўпи билан 75 фоизи миқдорида таъминот сифатида қабул қилинади, унинг умумий таъминот ҳажмидаги улуши эса 50 фоиздан ошмаслиги керак.
Низом, шунингдек, валютали облигациялар эмитентлари учун молиявий ковенантларни назарда тутади ҳамда жисмоний шахслар томонидан бундай қимматли қоғозларни банк тизими орқали харид қилишга қўйиладиган талабларни белгилайди.
\
