Сурхондарёда асрлар давомида ўсиб келаётган арча дарахтларининг кесилиши бўйича тергов олиб борилмоқда
Тошкент, Ўзбекистон (UzDaily.uz) — Ўзбекистон Экология ва иқлим ўзгариши миллий қўмитаси Сурхондарё вилояти Сариосиё туманидаги «Сангардак» маҳалласи ҳудудида жойлашган Узун ўрмон хўжалигида дарахтлар қўпориб ташлангани ва шикастлангани юзасидан текширув бошлади.
Идора маълумотига кўра, ҳодиса 3 август куни қайд этилган. Ҳолатни ўрганиш учун Экологик полиция, Бош прокуратура, Сурхондарё вилояти ҳокимлиги ва вилоят Экология бошқармаси вакилларидан иборат ишчи гуруҳ тузилган.
Дастлабки маълумотларга кўра, ишлар экология органлари ходимларининг огоҳлантиришларига қарамасдан, зарур рухсатнома ҳужжатларисиз амалга оширилган.
Дастлабки ҳисоб-китобларга кўра, ёши тахминан 100 йил бўлган Зарафшон арчасининг 11 туп дарахти қўпориб ташланган. Айни пайтда мутахассислар етказилган экологик зарар миқдорини баҳоламоқда, қурилиш ишларининг табиатни муҳофаза қилиш қонунчилиги талабларига мувофиқлигини текширмоқда ҳамда қонунбузилишга алоқадор шахсларни аниқламоқда.
Экология ва иқлим ўзгариши миллий қўмитасида маълум қилинишича, текширув якунланганидан сўнг айбдорлар қонунчиликка мувофиқ жавобгарликка тортилади. Тергов натижалари ҳақидаги қўшимча маълумотлар кейинроқ эълон қилинади.
