Тошкент, Ўзбекистон (UzDaily.uz) — Олий Мажлис Сенати Раисининг биринчи ўринбосари Содиқ Сафоев Ўзбекистондаги дипломатик миссиясини якунлаётган Буюк Британиянинг Ўзбекистондаги Фавқулодда ва Мухтор Элчиси Тимоти Смарт билан учрашди.
Учрашувда Ўзбекистон ва Буюк Британия ўртасидаги кенг қамровли шериклик муносабатларининг бугунги ҳолати ва ривожланиш истиқболлари муҳокама қилинди. Томонлар парламентлараро ва сиёсий мулоқот, шунингдек, савдо-иқтисодий, инвестиция ва таълим соҳаларидаги ҳамкорлик сезиларли даражада фаоллашганини қайд этди.
2024 йилда қабул қилинган Кенг қамровли шериклик тўғрисидаги декларация ҳамда 2026 йил февраль ойида имзоланган Қўшма декларация икки томонлама муносабатларни стратегик шериклик даражасига олиб чиқиш учун асос бўлиб хизмат қилаётгани алоҳида таъкидланди.
Амалий ҳамкорликнинг устувор йўналишлари сифатида инфратузилма, «яшил» энергетика, муҳим стратегик минераллар ва қишлоқ хўжалиги белгиланди.
Суҳбатда таълим масаласига ҳам алоҳида ўрин ажратилди. Томонлар қўшма дастурларни кенгайтириш, Ўзбекистонда Буюк Британиянинг етакчи университетлари филиалларини очиш, педагог кадрларни тайёрлаш ва инглиз тилини ўқитиш сифатини ошириш масалаларини муҳокама қилди.
Учрашув якунида томонлар парламентлараро мулоқотни янада фаоллаштириш ва эришилган келишувларни амалда татбиқ этишга тайёр эканини тасдиқлади.
