Тошкент, Ўзбекистон (UzDaily.uz) — Термиз шаҳрида Surxon Arena стадионининг тантанали очилиши бўлиб ўтди. 2023 йилдан 2025 йилгача бўлган даврда Eriell Group компанияси бош ҳомийлигида амалга оширилган қайта таъмирлаш лойиҳаси спорт инфратузилмасини сифат жиҳатидан янги босқичга олиб чиқди.

Термизнинг марказий қисмида жойлашган янгиланган стадион эндиликда энг юқори стандартларга жавоб беради. Трибуналарнинг умумий сиғими 10 599 томошабинни ташкил этади, бу эса "Сурхон" футбол клубининг мухлислари учун барча қулайликларни яратади.

"Сурхон" — 1968 йилда асос солинган ва Ўзбекистон Суперлигасида иштирок этадиган мамлакатнинг энг қадимий жамоаларидан бири. Бир неча мавсум мобайнида ўз майдонида ўйнай олмаган клуб, энди ўз уйига — янги шаклдаги аренасига қайтмоқда. Бу ерда уни нафақат содиқ мухлислари, балки принципиал тарзда янгиланган инфратузилма кутиб турибди.

Surxon Arena’даги асосий янгиланишлар:
FIFA талабларига жавоб берадиган юқори сифатли табиий газон

Кечки ўйинларни ўтказиш учун замонавий ёритиш тизими

Томошабинлар учун қулай ва кенг кўламли кўринишга эга трибуналар

Янгиланган ички хоналар — кийиниш хоналари, матбуот маркази ва техник ходимлар учун майдонлар

Ўзбекистон Профессионал футбол лигаси томонидан реконструкция ишлари юқори баҳоланди. Мутасаддилар фикрича, янгиланган Surxon Arena нафақат асосий жамоа, балки ёшлар ва аёллар жамоалари ривожи учун ҳам кучли туртки бўлади.

Арена реконструкцияси минтақада спортни оммалаштириш ва ривожлантириш учун янги имкониятларни очади. Термиз шаҳрида энди иқтидорли футболчиларни тарбиялаш, ёшларни соғлом турмуш тарзига жалб қилиш ва юқори даражадаги мусобақаларни ўтказиш учун барча шарт-шароитлар мавжуд.

Жорий мавсумда мухлисларни муҳим ўйинлар кутмоқда:
Ўзбекистон Суперлигаси:

6-тур: «Сурхон» – «Навбаҳор»

8-тур: «Сурхон» – «Пахтакор»

10-тур: «Сурхон» – «Сўғдиёна»

Ўзбекистон Кубоги:

«Динамо» ва «Лочин» жамоаларига қарши учрашувлар