ССВ COVID-19нинг «Цикада» штамми хавфини баҳолади

Тошкент, Ўзбекистон (UzDaily.uz) — Санитария-эпидемиологик осойишталик ва жамоат саломатлиги қўмитаси COVID-19’нинг янги «Цикада» (BA.3.2) штамми ҳақида тарқалган хабарларга изоҳ берди. Қўмита раисининг биринчи ўринбосари Нурмат Отабековнинг таъкидлашича, ҳозирги босқичда ушбу вирус варианти жиддий хавф туғдирмайди.

Маълум қилинишича, BA.3.2 штамми аввалроқ аниқланган бўлиб, юқори тарқалиш тезлиги билан тавсифланмайди. Унинг шартли номи «Цикада» вируснинг узоқ вақт давомида ўзи намоён бўлмаслиги хусусияти билан боғлиқ. Жаҳон соғлиқни сақлаш ташкилоти маълумотларига кўра, ушбу вариант 23 мамлакатда, жумладан АҚШ, Буюк Британия, Гонконг ва Мозамбикда қайд этилган.

Халқаро ташкилотлар вазиятни мониторинг қилишни давом эттирмоқда, бироқ ҳозирча янги штамм аввалги коронавирус вариантларига нисбатан хавфлироқ экани тасдиқланмаган.

Дастлабки маълумотларга кўра, касалликнинг клиник кўриниши «Омикрон» вариантига ўхшаш бўлиб, нафас йўлларининг зарарланиши, бурун оқиши, йўтал, томоқ оғриғи, шиллиқ қаватларнинг қизариши ҳамда айрим ҳолларда ҳид ва таъм сезиш қобилиятининг йўқолиши каби аломатларни ўз ичига олади.

Мутахассислар болалар ушбу вариант билан катталарга қараганда кўпроқ зарарланиши мумкинлигини таъкидламоқда. Бу катталар орасида вакцинация ёки касалликни бошдан кечириш орқали иммунитет шакллангани, болаларда эса иммун ҳимоя даражаси нисбатан пастлиги билан изоҳланади.

Юқори хавф гуруҳига шунингдек кексалар, сурункали касалликлари бор шахслар, иммунитети заиф ва нафас олиш тизими патологияси мавжуд беморлар киради.

ССВ вакили янги штамм қайд этилган ҳудудлардан келган шахслар билан алоқаларни чеклашни тавсия қилди. Шу билан бирга, «Цикада» янги эпидемия ёки пандемия тўлқинини келтириб чиқариши мумкин бўлган омил сифатида қаралмаслиги таъкидланди.

Мутахассислар баҳосига кўра, мамлакатда эпидемиологик вазият барқарор бўлиб қолмоқда, аҳоли ўртасида жамоавий иммунитет даражаси тахминан 80 фоизни ташкил этади, бу эса инфекциянинг кенг тарқалиш хавфини камайтиради.