Тошкент, Ўзбекистон (UzDaily.uz) — Ўзбекистон миллий терма жамоаси капитани Элдор Шомуродов Туркия чемпионатининг 5-турида Истанбулнинг «Башакшехир» клуби сафида дубль қайд этди.
«Башакшехир» ўз майдонида «Генчлербирлиги»ни 4:0 ҳисобида йирик мағлубиятга учратди.
Скев Олсен 9-дақиқада ҳисобни очди. Элдор Шомуродов 33-дақиқада жамоасининг иккинчи голини урди. У жарима майдони марказида тўпни қабул қилиб, бурилиб зарба берди ва рақиб дарвозасини ишғол қилди.
Учрашувнинг 53-дақиқасида Селке пенальтини аниқ амалга ошириб, «Башакшехир»нинг устунлигини оширди.
Элдор Шомуродов 65-дақиқада иккинчи голини урди. У Скев Олсендан узатма қабул қилиб, ҳимоячиларни ортда қолдирди ва аниқ зарба билан тўпни дарвозага жойлади.
Ўзбекистон терма жамоаси ярим ҳимоячиси Аббосбек Файзуллаев учрашувнинг 76-дақиқасида майдонга тушди.
