Шомуродов «Башакшехир» сафида учинчи голини урди

Тошкент, Ўзбекистон (UzDaily.uz) — Ўзбекистон миллий терма жамоаси капитани Элдор Шомуродов Туркия чемпионатида Истанбулнинг «Башакшехир» клуби сафида учинчи голини урди. У учта ўйинда учинчи марта рақиб дарвозасини ишғол қилди. Чемпионатнинг учинчи турида жамоа ўз майдонида «Касимпаша» билан 1:1 ҳисобида дуранг ўйнади.

Шомуродов учрашувни асосий таркибда бошлади ва 18-дақиқада рақиб дарвозасини ишғол қилиб, ҳисобни очди. Ўзбекистон терма жамоасининг яна бир вакили Аббосбек Файзуллаев ҳам баҳсни дастлабки дақиқалардан бошлади.

Танаффусдан сўнг Файзуллаев алмаштирилди. «Касимпаша» 81-дақиқада Фуссени Диабатенинг голи эвазига ҳисобни тенглаштирди.

Учта учрашувдан сўнг «Башакшехир» ҳисобида тўрт очко бор. «Касимпаша» эса беш очко жамғарган.