Саидов янги тайинланган Германия элчисининг ишонч ёрлиқлари нусхаларини қабул қилди

Тошкент, Ўзбекистон (UzDaily.uz) — Ўзбекистон ташқи ишлар вазири Бахтиёр Саидов 11 август куни Германиянинг Ўзбекистондаги янги тайинланган Фавқулодда ва Мухтор элчиси Маттиас Фоллертнинг ишонч ёрлиқлари нусхаларини қабул қилди. Бу ҳақда Ўзбекистон Ташқи ишлар вазирлиги хабар берди.

Учрашувда Саидов Германиянинг Европада Ўзбекистоннинг ишончли ҳамкорларидан бири сифатидаги ролини таъкидлади. Унинг сўзларига кўра, сўнгги йилларда олий даражадаги ташрифлар ва мунтазам сиёсий мулоқотлар туфайли Ўзбекистон-Германия муносабатлари изчил ривожланмоқда.

Томонлар икки томонлама кун тартибидаги долзарб масалаларни муҳокама қилди ҳамда олий даражада эришилган келишувларни ўз вақтида ва сифатли амалга ошириш муҳимлигини таъкидлади.