Тошкент, Ўзбекистон (UzDaily.uz) — Россиянинг Мордовия ва Самара вилоятларида жазо ўтаётган ватандошларнинг уч нафар вояга етмаган фарзанди Ўзбекистоннинг Қозон шаҳридаги Бош консулхонаси кўмагида Ўзбекистонга қайтарилди. Бу ҳақда «Дунё» ахборот агентлиги хабар берди.
Болаларни қайтариш Ўзбекистон Ташқи ишлар вазирлиги мувофиқлашуви асосида Россия Федерациясининг ваколатли органлари билан ҳамкорликда ташкил этилди.
Дипломатлар иш жараёнида вояга етмаганларнинг фуқаролигини аниқлади, уларнинг Ўзбекистонда яқин қариндошлари бор-йўқлигини ўрганди ҳамда болалар қайтарилганидан сўнг қандай шароитда бўлишини текширди. Шунингдек, уларни репатриация қилиш учун зарур ҳужжатлар расмийлаштирилди.
Барча тартиб-таомиллар якунлангач, Бош консулхона ходимлари болаларни жазони ижро этиш муассасалари ҳузуридаги болалар уйларидан олиб, кейинчалик уларни Ватанга қайтариш учун Ўзбекистон Ички ишлар вазирлиги вакилларига топширди.
Бош консулхона маълум қилишича, Россиядаги жазони ижро этиш муассасалари ҳузуридаги болалар уйларидан Ўзбекистон фуқароси бўлган вояга етмаганларни қайтариш бўйича ишлар тизимли равишда амалга оширилмоқда.
