O‘zbekistonning ikki loyihasi Shortlist Zero Project saraloviga kirdi
Тошкент, Ўзбекистон (UzDaily.uz) — O‘zbekiston Prezidenti huzuridagi Ijtimoiy himoya milliy agentligining ikki loyihasi nogironligi bo‘lgan shaxslar huquqlarini himoya qilish va ularning inklyuziyasini taʼminlashga bag‘ishlangan xalqaro Zero Project Awards 2027 mukofotining Shortlist ro‘yxatiga kirdi. Bu haqda Ijtimoiy himoya milliy agentligi matbuot xizmati xabar berdi.
Bu yil mukofot uchun 94 ta davlatdan 615 ta loyiha taqdim etildi. Xalqaro ekspertlar baholashi natijalariga ko‘ra, Agentlikning ikki tashabbusi saralashning keyingi bosqichiga yo‘l oldi.
Birinchi loyiha — «Faol hayot sari qadam» bo‘lib, vaucherlar asosida ijtimoiy xizmatlar ko‘rsatish milliy tizimini yaratishni nazarda tutadi.
Ikkinchi loyiha — Smart Voucher Ecosystem bo‘lib, nogironligi bo‘lgan shaxslarni protez-ortopediya buyumlari va reabilitatsiyaning texnik vositalari bilan taʼminlash uchun mo‘ljallangan innovatsion vaucher tizimidir.
Loyihalarning Shortlist ro‘yxatiga kiritilishi O‘zbekistonda inklyuziv muhitni rivojlantirish va nogironligi bo‘lgan shaxslar uchun imkoniyatlarni kengaytirish borasida amalga oshirilayotgan ishlar xalqaro darajada eʼtirof etilganidan dalolat beradi.
Keyingi bosqichda loyihalar qo‘shimcha ekspertlar ovoz berishida ishtirok etadi. Zero Project Awards 2027 g‘oliblarini 2026 yil 3 dekabr kuni eʼlon qilish rejalashtirilgan.
Shortlist ro‘yxatiga kirgan loyihalar, shuningdek, 2027 yil 10–12 fevral kunlari Vena shahrida bo‘lib o‘tadigan Zero Project Conference 2027 konferensiyasiga taklif etildi.
