Ўзбекистон ва KOICA ҳамкорликнинг янги йўналишларини муҳокама қилди
Тошкент, Ўзбекистон (UzDaily.uz) — Ўзбекистон ташқи ишлар вазири маслаҳатчиси Мунира Аминова 3 сентябрь куни Корея халқаро ҳамкорлик агентлигининг (KOICA) Ўзбекистондаги офиси янги директори Ким Мён Жин билан учрашди. Томонлар Ўзбекистон ва Корея ўртасидаги ҳамкорликнинг жорий ҳолати ва уни янада ривожлантириш истиқболларини муҳокама қилди.
Музокаралар давомида KOICAнинг Ўзбекистонда ижтимоий ва инфратузилмавий лойиҳаларни амалга оширишга қўшаётган салмоқли ҳиссаси қайд этилди.
Учрашувда сунъий интеллект ва рақамлаштириш соҳаларидаги ҳамкорликка алоҳида эътибор қаратилди. Хусусан, сунъий интеллект технологияларини соғлиқни сақлаш, қишлоқ хўжалиги ва таълим соҳаларига жорий этиш имкониятлари муҳокама қилинди.
Кун тартибидан иқлим ўзгариши ва сув ресурсларини бошқариш масалалари ҳам ўрин олди.
Томонлар шерикликни янада кенгайтириш ва янги қўшма ташаббусларни ишлаб чиқишдан ўзаро манфаатдор эканини билдирди.
Бунда Ўзбекистоннинг миллий ривожланиш устувор йўналишлари ва Корея Республикасининг тажрибасини инобатга олиш кўзда тутилмоқда.
Учрашув иштирокчилари, шунингдек, ҳамкорликнинг истиқболли йўналишлари ва келгуси лойиҳаларни белгилашда яқин мувофиқлашув ҳамда мунтазам фикр алмашиш муҳимлигини таъкидлади.
