Тошкент, Ўзбекистон (UzDaily.uz) — АҚШ давлат котиби Марко Рубио Самарқанд яна жаҳон савдосининг муҳим марказларидан бирига айланаётганини билдирди. Унинг X ижтимоий тармоғидаги саҳифасида эълон қилинган видео мурожаатида Вашингтоннинг Ўзбекистон билан иқтисодий ҳамкорликни кенгайтиришдан манфаатдор экани таъкидланди. Шунингдек, у минтақадаги ишбилармонлик музокараларида Америка компаниялари иштирок этаётганини қайд этди.
Рубионинг сўзларига кўра, АҚШдан юзлаб компаниялар шартномалар тузиш ва узоқ муддатли ҳамкорлик алоқаларини йўлга қўйиш учун Марказий Осиёга келган.
«Ер юзида тарихан жаҳон савдосида Самарқандчалик муҳим ўрин тутган жойлар кўп эмас. Бугун ушбу гўзал мажмуада нафақат тарихни ёдга олиш, балки келажакда олдимизда очилаётган имкониятлар ҳақида фикр юритиш учун бўлиш мен учун катта шараф», — деди давлат котиби.
Унинг таъкидлашича, АҚШ Ўзбекистон билан савдо, илм-фан, технологиялар ва бошқа соҳаларда ҳамкорлик қилиш учун катта салоҳиятни кўрмоқда. Рубионинг айтишича, Америка бизнеси шартномалар тузиш ва икки мамлакат, минтақа ҳамда Қўшма Штатларга ўзаро манфаат келтирадиган ҳамкорликни ривожлантиришдан манфаатдор.
Рубио, шунингдек, Самарқанднинг савдо чорраҳаси сифатидаги тарихий аҳамиятини таъкидлади. Унинг сўзларига кўра, шаҳар кўп асрлар давомида халқаро савдо йўлларининг бир қисми бўлиб келган ва энди АҚШ унинг савдо салоҳиятини ривожлантиришда иштирок этишни мақсад қилган.
«Кўп асрлар давомида жаҳон савдоси Самарқанд орқали ўтган. Бугун савдо бу ерга қайтаётир ва биз унинг фаол иштирокчиси бўлишни истаймиз. Ушбу ҳамкорлик янада ривожланишига умид қиламиз», — деди давлат котиби.
