Тошкент, Ўзбекистон (UzDaily.uz) — Тошкент шаҳрининг Аккурғон кўчасида коммунал инфратузилма тармоқларида таъмирлаш ишлари олиб борилиши ва йўлнинг айрим қисми вақтинча ёпилиши муносабати билан шаҳар автобус йўналишларининг ҳаракат схемасига ўзгартишлар киритилди.
Тошкент шаҳар Транспорт бошқармаси қатор шаҳар автобус йўналишларининг ҳаракат схемалари вақтинча ўзгартирилганини маълум қилди.
2 ва 136-сонли автобус йўналишларининг ҳаракат масофаси вақтинча қисқартирилади. Уларнинг сўнгги бекати «Гидрометеорология маркази» бекатига кўчирилади.
58 ва 199-сонли йўналишлар «НБУ спорт мажмуаси» бекатигача ҳаракатланади.
88-сонли автобус йўналиши Катта Дархон, Кичик ҳалқа йўли ва Паркент кўчалари орқали айланма йўналишга ўтказилади.
89 ва 95-сонли йўналишлар эса Осиё, Аккурғон кўчалари, Мустақиллик шоҳкўчаси ҳамда Паркент кўчалари орқали айланма йўналишда ҳаракатланади.
Транспорт бошқармаси қўшни кўчаларда транспорт оқими қайта тақсимланиши сабабли тирбандликлар юзага келиши, шунингдек, автобуслар орасидаги интерваллар узайиши мумкинлигидан огоҳлантирди. Зарур ҳолларда ҳаракат схемалари тезкор равишда қайта кўриб чиқилади.
Йўловчиларга сафарларни олдиндан режалаштириш ва имконият бўлса, муқобил йўналишлардан фойдаланиш тавсия этилди.
