Тошкент, Ўзбекистон (UzDaily.uz) — Ўзбекистон тоғ-кон саноати ва геология вазири Бобир Исломов Япониянинг Itochu Corporation компанияси ижрочи ва операцион бош директори Ямагучи Хисакадзу бошчилигидаги делегацияси билан учрашув ўтказди.
Музокараларда вазирликнинг масъул ходимлари ҳамда «Навоийуран» ДК раҳбарияти вакиллари ҳам иштирок этди.
Томонлар геология-қидирув ишлари соҳасидаги ҳамкорликни кенгайтириш истиқболларига асосий эътибор қаратди. Хусусан, истиқболли майдонларда тадқиқотлар ўтказиш ва конларни кейинчалик ўзлаштириш масалалари муҳокама қилинди.
Учрашувнинг алоҳида мавзуси геологик маълумотларни халқаро стандартларга мувофиқлаштириш бўлди. Шунингдек, иштирокчилар бошқа йўналишларда ҳам ҳамкорлик қилиш имкониятларини кўриб чиқди.
Учрашув якунлари бўйича томонлар Ўзбекистон ва Itochu Corporation ўртасида тоғ-кон ва геология соҳаларидаги ҳамкорликни янада ривожлантириш масалаларини муҳокама қилди.
