Тошкент, Ўзбекистон (UzDaily.uz) — Қорақалпоқ давлат университетида 17 сентябрь куни Хитой Халқ Республикасининг Сюйчжоу саноат ва технологиялар коллежи ҳамда XCMG компанияси вакиллари билан учрашув бўлиб ўтди. Бу ҳақда Бердаҳ номидаги Қорақалпоқ давлат университети хабар берди.
Учрашув давомида университет ректори Б. Жоллыбеков ва Хитой делегацияси аъзолари таълим, илм-фан ва ишлаб чиқариш соҳаларида ҳамкорликни ривожлантириш масалаларини муҳокама қилди. Томонлар замонавий технологиялар асосида амалий кўникмаларга эга юқори малакали мутахассислар тайёрлаш бўйича фикр алмашдилар.
Музокаралар якунлари бўйича Бердаҳ номидаги Қорақалпоқ давлат университети, Сюйчжоу саноат ва технологиялар коллежи ҳамда XCMG компанияси ўртасида уч томонлама ҳамкорлик меморандуми имзоланди.
Ҳужжат ҳамкорликнинг бир қатор муҳим йўналишларини қамраб олади. Улар орасида замонавий халқаро талабларга мувофиқ қурилиш машинасозлиги соҳасида мутахассислар тайёрлаш, таълим дастурлари ва ўқув-услубий ресурсларни биргаликда ишлаб чиқиш, профессор-ўқитувчилар ва техник мутахассислар алмашинувини ташкил этиш, шунингдек, талабаларнинг амалий тайёргарлик тизимини такомиллаштириш каби йўналишлар бор.
Ҳамкорликнинг муҳим йўналишларидан бири дуал таълим тизимини жорий этиш бўлади. Ушбу модель орқали талабалар университетда нафақат назарий билим олиш, балки XCMG компаниясининг ишлаб чиқариш ва сервис корхоналарида бевосита амалий тайёргарликдан ўтиш имкониятига эга бўлади. Бунда ишлаб чиқариш амалиётини ташкил этиш, замонавий техника ва технологиялар билан ишлаш кўникмаларини шакллантириш, шунингдек, меҳнат бозори талабларига мос касбий компетенцияларни ривожлантиришга алоҳида эътибор қаратилади.
Бундан ташқари, томонлар Қорақалпоқ давлат университетининг қурилиш факультетида XCMGнинг Қурилиш машинасозлиги хорижий технологиялар институти Ўзбекистон филиалини ташкил этиш бўйича қўшма лойиҳани амалга ошириш масаласини муҳокама қилди.
Лойиҳа доирасида замонавий таълим дастурларини жорий этиш, илғор халқаро тажрибани ўқув жараёнига интеграция қилиш ва ишлаб чиқариш соҳаси билан узвий боғлиқ мутахассислар тайёрлаш имкониятларини кенгайтириш режалаштирилмоқда.
Учрашув якунлари бўйича томонлар таълим ва ишлаб чиқариш интеграциясини мустаҳкамлаш, дуал таълимнинг самарали механизмларини босқичма-босқич жорий этиш ҳамда қўшма таълим лойиҳаларини амалга оширишга келишиб олдилар.
Мазкур ҳамкорлик талабаларнинг назарий тайёргарлигини амалий тажриба билан уйғунлаштириш, халқаро тажрибани таълим жараёнига жорий этиш ва замонавий муҳандислик йўналишлари учун малакали кадрлар тайёрлаш имкониятларини кенгайтиришга хизмат қилади.
