Тошкент, Ўзбекистон (UzDaily.uz) — Қорақалпоғистонда умумий қуввати 1 ГВт бўлган дата-марказларни энергия билан таъминлаш учун янги энергетика инфратузилмасини яратиш режалаштирилмоқда. Лойиҳа Нукус туманида технопарк барпо этиш ва уни қайта тикланувчи энергия манбалари орқали электр энергияси билан таъминлашни назарда тутади. Бу ҳақда Ўзбекистон Энергетика вазирлиги хабар берди.
Ўзбекистон президенти топшириқларига мувофиқ, Нукус туманида таркибига умумий қуввати 1 ГВт бўлган дата-марказлар кирадиган технопарк ташкил этилади. Уларнинг фаолияти учун «яшил» энергиядан фойдаланиш кўзда тутилган.
Лойиҳа доирасида Қорақалпоғистонда истиқболли шамол электр станцияларини дата-марказлар билан боғлаш имконини берадиган янги электр инфратузилмаси барпо этилади. Жумладан, 500/220 кВ кучланишли янги подстанция ва 220 кВ кучланишли қўшимча электр узатиш линияси қурилиши режалаштирилмоқда.
Янги инфратузилма Нукусдаги дата-марказларни умумий қуввати 3,3 ГВт бўлган минтақадаги шамол электр станцияларига улаш имконини беради. Бунда дата-марказларни энергия билан таъминлаш аҳоли ва иқтисодиёт тармоқларининг амалдаги электр истеъмолига таъсир қилмаган ҳолда ташкил этилади.
Бунинг учун дата-марказларни алоҳида ҳудудда жойлаштириш ва уларни зарур энергетика инфратузилмаси билан комплекс таъминлаш режалаштирилмоқда. Энергетика вазирлиги маълумотларига кўра, йирик объектларни бир жойга жамлаш инфратузилма харажатларини оптималлаштириш ва электр таъминотини ташкил этиш самарадорлигини ошириш имконини беради.
Ташкил этиладиган дата-марказлар нафақат Ўзбекистон, балки бутун минтақа учун рақамли хизматлар ва юқори технологик ечимларни тақдим этиши кутилмоқда.
Янги энергетика инфратузилмасининг биринчи босқичини 2027 йилнинг иккинчи ярмида фойдаланишга топшириш режалаштирилган. Инфратузилманинг тўлиқ қувватга чиқиши 2028 йилнинг иккинчи ярмига мўлжалланган.
Лойиҳанинг амалга оширилиши янги дата-марказларни энергетика тизимига интеграция қилиш, юқори технологияли инвестицияларни жалб этиш ва Қорақалпоғистоннинг энергетик салоҳиятидан янада самарали фойдаланиш учун шароит яратиши кутилмоқда.
