Тошкент, Ўзбекистон (UzDaily.uz) — Ўзбекистон ва Осиё тараққиёт банки (ОТБ) рақамли трансформация, инновацияларни ривожлантириш ва илғор технологияларни жорий этиш соҳаларида ҳамкорликни кенгайтиришга келишиб олди. Бу ҳақда Ўзбекистон Рақамли технологиялар вазирлиги хабар берди.
Келишувлар Рақамли технологиялар вазири Шерзод Шерматовнинг ОТБнинг Ўзбекистондаги доимий ваколатхонаси директори Канокпан Лао-Арайя билан учрашувида эришилди.
Томонлар мамлакатда рақамли трансформацияни жадаллаштириш, илғор технологиялар ва инновацияларни ривожлантириш, шунингдек, ушбу йўналишларда ОТБ билан ҳамкорликни янада кенгайтириш масалаларини муҳокама қилди.
Иқтисодиётнинг турли тармоқларига рақамли технологияларни жорий этиш, Ўзбекистоннинг минтақавий рақамли марказ сифатидаги салоҳиятини ошириш ва халқаро ҳамкорликни мустаҳкамлаш масалаларига алоҳида эътибор қаратилди.
ОТБ вакили Ўзбекистонда амалга оширилаётган ислоҳотлар, мамлакат раҳбариятининг рақамли трансформацияга қаратаётган эътибори ва ёшларнинг интеллектуал салоҳияти рақамли иқтисодиётни ривожлантириш учун замин яратаётган омиллар эканини таъкидлади.
Шунингдек, Ўзбекистоннинг рақамли трансформация соҳасидаги тажрибаси Марказий Осиё учун муҳим аҳамият касб этиши қайд этилди. Томонлар рақамли ечимларни жорий этиш, инновацион инфратузилмани ривожлантириш ва янги технологиялар асосида иқтисодий ўсишни рағбатлантиришга қаратилган ташаббусларни кўриб чиқди.
Музокаралар давомида кадрлар салоҳиятини ривожлантириш масаласи ҳам алоҳида муҳокама қилинди. Хусусан, тажриба алмашиш имкониятларини кенгайтириш, давлат хизматчиларининг малакасини ошириш ва хорижий илғор тажрибаларни ўрганиш мақсадида Жанубий Кореяда алоқа офисини ташкил этиш имконияти кўриб чиқилди.
ОТБ, шунингдек, давлат хизматчиларининг малакасини оширишни тизимли қўллаб-қувватлаш, институционал имкониятларни мустаҳкамлаш ва рақамли лойиҳаларни амалга ошириш самарадорлигини ошириш бўйича режаларини тақдим этди.
Учрашув якунида томонлар рақамли технологиялар ва инновацияларни ривожлантириш, режалаштирилган ташаббусларни амалга ошириш ҳамда Ўзбекистонни инновациялар ва илғор технологияларнинг минтақавий марказига айлантиришни қўллаб-қувватлаш бўйича ҳамкорликни давом эттиришга келишиб олди.
Учрашув доирасида Ўзбекистонда рақамли трансформацияни жадаллаштириш, иқтисодиётнинг турли тармоқларида рақамли технологиялар ва инновацияларни жорий этишни кенгайтириш ҳамда мамлакатнинг илғор технологиялар соҳасидаги салоҳиятини ривожлантиришга қаратилган ўзаро англашув меморандуми ҳам имзоланди.
