Тошкент, Ўзбекистон (UzDaily.uz) — Қатарнинг Artan Holding компанияси ва City University Qatar Ўзбекистонга сармоя киритиш имкониятларини, жумладан, давлат активларини сотиб олиш ва халқаро даражадаги университет очиш масалаларини ўрганмоқда. Бу масалалар Ўзбекистон Давлат активларини бошқариш агентлиги (ДAБA)да бўлиб ўтган учрашувда муҳокама қилинди.
Учрашувда агентлик директорининг ўринбосари Алишер Миралиев, Artan Holding вакиллари ҳамда City University Qatar президенти, профессор Faris Gorashi Faris иштирок этди.
Томонлар Қатар компаниясининг давлат активларини хусусийлаштириш жараёнида иштирок этиш имкониятларини кўриб чиқди. Бунда Тошкент шаҳридаги кўчмас мулк объектлари, шунингдек, «Янги Тошкент» ҳудудидаги ер участкаларини сотиб олиш масалаларига эътибор қаратилди.
Таълим инфратузилмасини ривожлантириш истиқболлари ҳам алоҳида муҳокама қилинди. Artan Holding ва City University Qatar вакиллари Ўзбекистонда халқаро даражадаги университет очиш имкониятларини ўрганишдан манфаатдор эканини билдирди. Қатар томони лойиҳани амалга ошириш учун эҳтимолий майдонлар ва кўчмас мулк объектларини кўриб чиқмоқда.
Учрашув давомида агентлик вакиллари Ўзбекистон Президенти фармонида назарда тутилган давлат активларини хусусийлаштиришнинг янги механизмлари ҳақида ҳам маълумот берди. Ушбу механизмлар объектларни имтиёзли шартларда, фоизсиз бўлиб тўлаш ёки тўлиқ тўлов амалга оширилганда чегирма олиш орқали сотиб олиш имконини беради.
Жумладан, объект қийматининг 35 фоизи уч ой ичида дастлабки тўлов сифатида тўланса, қолган суммани беш йилгача бўлган муддатда фоизсиз бўлиб тўлаш мумкин.
Агар дастлабки тўлов миқдори объект қийматининг 50 фоизини ташкил этса ва олти ой ичида амалга оширилса, қолган суммани фоизсиз бўлиб тўлаш муддати етти йилгача етиши мумкин. Объект қиймати олти ой ичида тўлиқ тўланган тақдирда, харидорга унинг умумий қийматидан 25 фоиз чегирма берилади.
Учрашув якунида томонлар Artan Holding ва City University Qatar вакиллари учун электрон аукционга қўйилган объектлар билан танишувни ташкил этишга келишиб олди. Шунингдек, таълим лойиҳасини амалга ошириш режаларини ҳисобга олган ҳолда «Янги Тошкент» ҳудудидаги мавжуд ер участкаларини кўриб чиқишга келишилди.
Artan Holding — 1997 йилда ташкил этилган Қатар компанияси. Унинг асосий фаолият йўналишлари таълим, кўчмас мулк, муҳандислик, энергетика ва инфратузилмани ривожлантиришдан иборат.
