Тошкент, Ўзбекистон (UzDaily.uz) — Ўзбекистонда тегишли рухсатномасиз кўп квартирали уйларни такроран қуриш учун жиноий жавобгарлик белгиланди. Ҳолатга қараб, қоидабузарлик учун етти йилгача озодликдан маҳрум қилиш жазоси қўлланилиши мумкин.
Ўзгартишлар 2026 йил 28 сентябрда қабул қилинган ЎРҚ–1179-сонли қонун билан киритилди. Ҳужжат қурилиш соҳасида давлат назорати ва бошқарувини такомиллаштиришга қаратилган.
Қурилиш-монтаж ишларини бошлаш учун қурилиш ҳамда уй-жой коммунал хўжалиги соҳасида назорат бўйича ҳудудий инспекциялардан тегишли рухсатнома олиш зарур.
Агар кўп квартирали уйни рухсатномасиз қуриш маъмурий жазо қўлланилганидан кейин такроран содир этилса, айбдор шахсга уч йилдан беш йилгача озодликдан маҳрум қилиш жазоси тайинланиши мумкин.
Шаҳарсозлик тўғрисидаги қонунчиликни бузиш инсон ўлими ёки бошқа оғир оқибатларга олиб келган ҳолатларда янада қаттиқроқ жазо белгиланган. Бундай қоидабузарликлар учун беш йилдан етти йилгача озодликдан маҳрум қилиш жазоси қўлланилади.
Қонун расмий эълон қилинган кундан эътиборан уч ой ўтгач кучга киради.
