Тошкент, Ўзбекистон (UzDaily.uz) — Ўзбекистон Тоғ-кон саноати ва геология вазирлиги ҳамда Юта университети геология ва тоғ-кон саноати соҳаларидаги ҳамкорликни кенгайтириш масалаларини муҳокама қилди.
Музокаралар 2026 йил 2 октябрда Тошкент шаҳрида бўлиб ўтди. Учрашувда Тоғ-кон саноати ва геология вазири Бобир Исломов, вазирлик вакиллари ҳамда Ўзбекистон Геология миллий университети раҳбарияти иштирок этди. Америка делегациясига Юта университетининг глобал алоқалар бўйича проректори ва халқаро ишлар бўйича катта ходими Рэнди Маккриллис бошчилик қилди.
Учрашув аввалида Юта университети вакиллари Ўзбекистон томонига қабул учун миннатдорлик билдириб, университет ва Ўзбекистон ўртасидаги ҳамкорликни янада ривожлантиришдан манфаатдор эканини таъкидлади.
Музокараларнинг асосий йўналишларидан бири геология ва тоғ-кон соҳаларида илмий-тадқиқот фаолиятини ривожлантириш бўлди. Вазирлик вакиллари, шунингдек, соҳа мутахассисларининг малакасини ошириш ҳамда замонавий технологик йўналишлар билан боғлиқ қўшма лойиҳаларни амалга ошириш зарурлигини муҳокама қилди.
Ўз навбатида, Юта университети вакиллари таълим соҳасидаги ҳамкорликни кенгайтиришдан манфаатдор эканини билдирди. Хусусан, тоғ-кон саноати учун юқори малакали мутахассислар тайёрлаш ва илмий тадқиқотлар соҳасида ҳамкорликни ривожлантириш масалалари муҳокама қилинди.
Учрашув якунида томонлар таълим, илм-фан ва технология соҳаларидаги алоқаларни янада ривожлантиришдан манфаатдор эканини тасдиқлади.
