Ўзбекистон ва Хорватия қонунчилик мулоқоти ва делегациялар алмашинувини фаоллаштиришга келишиб олдилар
Тошкент, Ўзбекистон (UzDaily.uz) — Жорий йилнинг 17 февраль куни Олий Мажлис Сенати Раисининг биринчи ўринбосари Содиқ Сафоев Хорватия парламенти Конституция, регламент ва сиёсий тизим қўмитаси раиси Иван Маленица билан учрашди.
Суҳбат чоғида Ўзбекистон ва Хорватия ўртасидаги парламентлараро ҳамкорликнинг бугунги ҳолати ва истиқболлари муҳокама қилинди.
Томонлар қонунчилик фаолияти, парламентлараро мулоқотни, қўмиталар ўртасидаги ҳамкорликни кенгайтириш ҳамда делегациялар алмашинувини фаоллаштириш масалаларига алоҳида эътибор қаратди.
Музокараларда савдо-иқтисодий ҳамкорликни кенгайтириш, хусусан фармацевтика, тиббий технологиялар, саноат ускуналари, тўқимачилик, агроқайта ишлаш ҳамда транспорт-логистика соҳаларида қўшма лойиҳаларни ривожлантириш масалалари юзасидан ҳам фикр алмашилди.
