Тошкент, Ўзбекистон (UzDaily.uz) — Ўзбекистон делегацияси Уммон Султонлигида қатор ишбилармонлик учрашувларини ўтказди. Унда томонлар геология, тоғ-кон саноати, геологик қидирув ишлари ва инвестицияларни жалб этиш соҳаларида ҳамкорликни ривожлантириш масалаларини муҳокама қилди.
Тоғ-кон саноати ва геология вазири ўринбосари Рустам Юсупов Уммоннинг Minerals Development Oman (MDO) компанияси вакиллари билан учрашди.
Томонлар истиқболли участкаларда геологик қидирув ишларини ташкил этиш, шунингдек, қимматбаҳо минераллар конларини ўзлаштириш бўйича ҳамкорлик имкониятларини кўриб чиқди.
Tasnim Group компанияси билан ҳам алоҳида музокаралар ўтказилди. Асосий эътибор муҳим минераллар соҳасидаги ҳамкорлик, Ўзбекистондаги истиқболли участкаларда қўшма геологик қидирув ишларини олиб бориш ва янги инвестиция лойиҳаларини амалга оширишга қаратилди.
Ташриф доирасида Ўзбекистон томони вакиллари, шунингдек, Уммон Савдо-саноат палатаси, Иқтисодиёт вазирлиги, Савдо, саноат ва инвестицияларни рағбатлантириш вазирлиги, шунингдек, Махсус иқтисодий зоналар ва эркин зоналар давлат бошқармаси билан учрашувлар ўтказди.
Бундан ташқари, Уммоннинг Nine Business Company LLC, Oman Trade Establishment, OQ, Al Zubair Corporation LLC ва Asyad Group компаниялари вакиллари билан музокаралар бўлиб ўтди.
Учрашувлар давомида томонлар тоғ-кон саноати ва геология соҳаларида ўзаро манфаатли ҳамкорликни кенгайтириш муҳимлигини таъкидлади. Тегишли йўналишларга замонавий технологиялар ва инвестицияларни жалб этиш бўйича амалий ҳамкорликни давом эттиришга алоҳида эътибор қаратилди.
Музокаралар якунлари бўйича томонлар ҳамкорликнинг истиқболли йўналишлари бўйича ўзаро ҳамкорликни давом эттиришга келишиб олди.
