Тошкент, Ўзбекистон (UzDaily.uz) — Ўзбекистон ва Словакия савдо-иқтисодий ҳамкорликни кенгайтириш, ўзаро товар айирбошлаш ҳажмини ошириш ва инвестициявий алоқаларни ривожлантириш истиқболларини муҳокама қилди.
Ўзбекистон Савдо-саноат палатаси раиси Даврон Ваҳабов Словакиянинг Ўзбекистондаги элчиси Виктор Борецкий билан учрашув ўтказди.
Томонлар экспорт-импорт операцияларини кенгайтириш ва икки мамлакат компанияларининг янги бозорларга чиқиш имкониятларини кўриб чиқди. Шунингдек, қўшма корхоналар ташкил этиш ва давлат-хусусий шериклик лойиҳаларини амалга ошириш масалаларига алоҳида эътибор қаратилди.
Музокаралар давомида Словакия томони ўзбекистонлик тадбиркорлар учун мамлакатдаги инвестиция имкониятлари, жумладан, ер участкаларини ажратиш шартлари ва бизнесни қўллаб-қувватлаш чоралари ҳақида маълумот берди. Учрашув иштирокчилари меҳнат миграцияси соҳасидаги икки томонлама ҳамкорликни тартибга солиш масалаларини ҳам муҳокама қилди.
Словакия ишбилармон доиралари вакиллари 2026 йил 29 ноябрдан 5 декабрга қадар бўлиб ўтадиган «New Uzbekistan: Crossroads of Global Markets» халқаро форумида иштирок этиши кутилмоқда.
