Тошкент, Ўзбекистон (UzDaily.uz) — Корея Республикасига ташриф доирасида Ўзбекистон Фармацевтика маҳсулотлари хавфсизлиги маркази директори Алишер Темиров Осонг ва Асан шаҳарларида жойлашган Unimed фармацевтика компаниясининг ишлаб чиқариш мажмуаларига ташриф буюрди. Бу ҳақда Ўзбекистон Фармацевтика маҳсулотлари хавфсизлиги маркази хабар берди.
Ташриф давомида Ўзбекистон вакиллари Корея Республикаси фармацевтика ишлаб чиқаришида қўлланилаётган замонавий технологиялар, маҳсулотлар сифати ва хавфсизлигини таъминлаш тизимлари, шунингдек, илмий-тадқиқот фаолиятини ишлаб чиқариш жараёнлари билан интеграция қилиш ёндашувлари билан танишди.
Unimed ишлаб чиқариш майдонларида иштирокчиларга биологик маҳсулотлар ва дори воситаларини ишлаб чиқариш жараёнлари, технологик линиялар ҳамда ишлаб чиқаришнинг асосий босқичлари тақдим этилди. Сифат назоратининг амалий механизмлари, ишлаб чиқариш самарадорлигини ошириш ва замонавий технологияларни жорий этиш масалаларига алоҳида эътибор қаратилди.
Томонлар компаниянинг тадқиқот ва ишланмалар (R&D) соҳасидаги фаолиятини ҳам кўриб чиқди. Хусусан, иштирокчилар лаборатория инфратузилмаси, янги фармацевтика маҳсулотларини ишлаб чиқиш ва мавжуд препаратларни такомиллаштириш жараёнлари, шунингдек, тадқиқот натижаларини ишлаб чиқариш амалиётига жорий этиш механизмларини ўрганди.
Музокаралар давомида Ўзбекистон ва Корея Республикаси ўртасида фармацевтика соҳасидаги ҳамкорликни янада ривожлантириш истиқболлари муҳокама қилинди.
Устувор йўналишлар қаторида технологиялар ва билимлар алмашинувини кенгайтириш, мутахассислар малакасини ошириш ҳамда қўшма лойиҳаларни амалга ошириш белгиланди.
Томонлар фармацевтика маҳсулотларининг сифати ва хавфсизлигини таъминлаш масалаларига алоҳида эътибор қаратди.
