Тошкент, Ўзбекистон (UzDaily.uz) — Ўзбекистон Қишлоқ хўжалиги вазирлиги Таиланднинг Charoen Pokphand Foods Public Company Ltd. (CPF) компанияси билан қишлоқ хўжалиги ва озиқ-овқат саноатида инвестициявий ҳамкорлик истиқболларини муҳокама қилди. Бу ҳақда Ўзбекистон Республикаси Қишлоқ хўжалиги вазирлиги хабар берди.
Учрашувда CPF делегациясига компаниянинг Россиядаги ваколатхонаси бош директори Бури Срина бошчилик қилди. Томонлар ҳамкорлик учун мавжуд имкониятлар ва қўшма инвестиция лойиҳаларини тайёрлаш масалаларини кўриб чиқди.
Учрашув аввалида CPF вакиллари компания фаолияти, унинг агросаноат ва озиқ-овқат соҳаларидаги тажрибаси, халқаро лойиҳалари ҳамда инвестициявий фаолияти ҳақида маълумот тақдим этди. Компаниянинг Россиядаги паррандачилик фабрикаси фаолиятига ҳам алоҳида тақдимот бағишланди.
Ҳамкорликнинг устувор йўналишлари сифатида томонлар қорамол ва парранда учун озуқа ишлаб чиқариш, паррандачилик ва чорвачиликни ривожлантириш, замонавий агротехнологияларни жорий этиш, шунингдек, биологик хавфсизлик технологиялари ва тизимларидан фойдаланишни белгилади.
Учрашув якунлари бўйича иштирокчилар истиқболли лойиҳалар, ҳамкорликнинг эҳтимолий шакллари, инвестициялар ҳажми ва зарур ресурсларни баҳолаш, шунингдек, тегишли инвестиция ташаббусларини кейинги босқичда тайёрлаш масалаларини муҳокама қилди.
