Тошкент, Ўзбекистон (UzDaily.uz) — Ўзбекистоннинг бешта стартапи ноябрь ойи бошида Гонконгда бўлиб ўтган Hong Kong FinTech Week ва Cyberport Venture Capital Forum 2026 тадбирларида иштирок этди. IT Park Uzbekistan делегацияси Cyberport томонидан ташкил этилган Global Landing Program 2026 акселерация дастури доирасида 2–6 ноябрь кунлари ушбу шаҳарда бўлди. Бу ҳақда IT Park Uzbekistan хабар берди.
Делегация таркибидан Tass Vision, OX System, Unitlab AI, Aziza AI ва Qwatt стартаплари ўрин олди. Ташриф давомида компаниялар вакиллари халқаро инвесторлар, венчур фондлар ҳамда технологик ташкилотлар билан учрашувлар ўтказиб, хорижий бозорларга чиқиш ва молиялаштириш жалб этиш имкониятларини муҳокама қилди.
2–3 ноябрь кунлари Hong Kong FinTech Week доирасида стартаплар Cyberport, InvestHK ва бошқа халқаро ташкилотлар вакиллари билан учрашди. Иштирокчилар инвестициялар жалб қилиш ва янги ишбилармонлик алоқаларини ўрнатиш имкониятларини ҳам ўрганди.
4–5 ноябрь кунлари Cyberport Venture Capital Forum 2026 форумида венчур молиялаштириш, технологик компанияларни халқаро миқёсда кенгайтириш, DeepTech соҳасидаги лойиҳаларни ривожлантириш ва стартапларни қўллаб-қувватлаш масалалари муҳокама қилинди.
Global Track Pitching тақдимот сессияси доирасида OX System ва Tass Vision компаниялари ўз ишланмаларини халқаро аудиторияга намойиш этди. Ушбу сессияда иштирок этиш уларга салоҳиятли инвесторлар ва ҳамкорлар билан бевосита мулоқот қилиш имконини берди.
IT Park Uzbekistan вакили ҳам стартапларнинг дастлабки босқичларида молиялаштириш, Марказий Осиё ва АСЕАН мамлакатларида бизнесни кенгайтириш имкониятлари, шунингдек, венчур лойиҳаларини қўллаб-қувватлашга бағишланган панель муҳокамасида иштирок этди.
Ташриф давомида делегация Cyberport, Hong Kong Science and Technology Parks Corporation, Hong Kong Trade Development Council, InvestHK, FinTech HK ва Hang Seng Bank вакиллари билан музокаралар ўтказди.
Бундан ташқари, сунъий интеллект, маълумотларни таҳлил қилиш ва технологик ечимлар соҳаларида VOTEE AI ҳамда FCC Analytics компаниялари билан эҳтимолий ҳамкорлик масалалари муҳокама қилинди.
Ўзбекистон вакиллари Сингапур, Малайзия, Тайвань ва бошқа бозорлардан келган стартаплар билан ҳам алоқалар ўрнатди.
Делегация Cyberport’нинг инкубация дастурлари, халқаро инвесторлар тармоқлари, AWS технологиялари ҳамда Гонконгда хорижий компанияларни қўллаб-қувватлаш механизмлари билан танишди.
