Ўзбекистон Перудан фирибгарлик иши бўйича шахсни экстрадиция қилди

Тошкент, Ўзбекистон (UzDaily.uz) — Ўзбекистонга Перу давлатидан йирик миқдордаги фирибгарлик иши бўйича Интерпол каналлари орқали халқаро қидирувда бўлган Туркия Республикаси фуқароси экстрадиция қилинди. Бу ҳақда Ўзбекистондаги Интерпол Миллий марказий бюроси хабар берди.

Идора маълумотига кўра, операция Тошкент ва Лима шаҳарларидаги Интерпол Миллий марказий бюроларининг мувофиқлаштирилган ҳаракатлари натижасида амалга оширилган. Унда Ўзбекистон Бош прокуратурасининг Халқаро-ҳуқуқий департаменти ва Перу Адлия вазирлиги иштирок этган. Шунингдек, экстрадиция жараёнида транзитни таъминлашда Франция ва Бирлашган Араб Амирликлари ваколатли органлари кўмак бергани қайд этилди.

Тергов маълумотларига кўра, гумонланувчи Перу ҳудудида яшириниб юрган ва халқаро қидирув тадбирлари доирасида қўлга олинган. Унинг экстрадиция қилиниши Ўзбекистон Жиноят кодексининг 168-моддаси 4-қисмига мувофиқ қўзғатилган жиноят иши доирасида амалга оширилган бўлиб, мазкур модда йирик миқдордаги фирибгарлик учун жавобгарликни назарда тутади.

Интерпол Миллий марказий бюроси таъкидлашича, мазкур экстрадиция ҳуқуқни муҳофаза қилувчи органларнинг халқаро ҳамкорлиги самараси бўлиб, Интерполга аъзо давлатларнинг трансмиллий жиноятчиликка қарши курашдаги самарали ҳамкорлигини тасдиқлайди.

Ўзбекистонга топширилгандан сўнг, экстрадиция қилинган шахс Интерпол Миллий марказий бюроси ва Бош прокуратура ходимлари кузатувида мамлакатга олиб келинди. Унга нисбатан миллий қонунчиликка мувофиқ кейинги процессуал ҳаракатлар ўтказилиб, жиноий жавобгарликка тортилади.