Тошкент, Ўзбекистон (UzDaily.uz) — Рақобат қўмитаси айрим дори воситалари белгиланган нархдан анча юқори, айрим ҳолларда қарийб олти баравар қимматга сотилган ҳолатларни аниқлади. Қоидабузарликлар «яширин харидор» тадбирлари давомида аниқланган.
«SHUNQORLAR» МЧЖ дорихонасида «ПОЛИМИК® блистеры №10 (1x10)» дори воситаси рухсат этилган чакана нархи 12 837,18 сўм бўлишига қарамай, 70 000 сўмдан сотилган. Бу белгиланган нархдан 5,5 баравар юқори. «КОНВУЛЕКС® Капли для приема внутрь 300 мг/мл» препаратининг рухсат этилган нархи 66 481 сўм бўлгани ҳолда, 395 000 сўмдан таклиф қилинган. Бу эса белгиланган нархдан қарийб олти баравар юқори.
Қорақамиш-2/5 массивидаги «MUNO FARM» МЧЖ дорихонасида «СТИМУЛОТОН Таблетки покрытые оболочкой 50 мг блистеры №30 (3x10)» препарати рухсат этилган нархи 50 666,17 сўм бўлишига қарамай, 295 000 сўмдан сотилган. Бу белгиланган нархдан қарийб олти баравар қиммат.
«CITY FARM» МЧЖ дорихоналарида «БАКТАМЕД 3,5 мл ампулы» препаратининг рухсат этилган нархи 18 849,43 сўм бўлган, бироқ у 63 000 сўмдан сотилган. Яъни нарх 3,3 баравар оширилган. Бундан ташқари, «НО-ШПА® 40 мг/2 мл ампулы №25» препаратини сотишда ҳам белгиланган нархдан ошиш ҳолати аниқланган.
«HOSIL FARM» МЧЖ дорихонасида «Лантус® СОЛОСТАР® 100 ЕД/мл 3 мл №5 (1x5)» препарати рухсат этилган 20 фоизлик устама қўшилган ҳолдаги 115 173,3 сўмлик нарх ўрнига 190 000 сўмдан сотилган. Амалдаги устама 80 фоизни ташкил этган. Яна бир препарат — «СЛИДЕРОН Таблетки 16 блистеры №20 (2x10)» — рухсат этилган нархи 115 677,1 сўм бўлишига қарамай, 349 000 сўмдан сотилган. Бу белгиланган нархдан уч баравар юқори.
«AMIR FARM TRADE» МЧЖ дорихонасида «БАКТАМЕД 0,5% 3,5 мл ампулы» препарати 18 849,43 сўмлик рухсат этилган нарх ўрнига 32 000 сўмдан сотилган. Қўмита маълумотларига кўра, устама миқдори рухсат этилган 20 фоиз ўрнига 100 фоизни ташкил этган.
«FERUZA NUR MED» МЧЖ дорихонасида «ПОЛИМИК® блистеры №10 (1x10)» препаратининг рухсат этилган нархи 12 837,18 сўм бўлгани ҳолда, 62 000 сўмдан сотилган. Бу белгиланган нархдан қарийб беш баравар юқори.
«НО-ШПА® 40 мг/2 мл ампулы №25» препарати бўйича белгиланган нархдан ошиш ҳолати «LEADER PHARMGROUP» ХК, «PHARM S GOLDEN» МЧЖ ва «RUSLAN BUYUK FARM» МЧЖ дорихоналарида ҳам аниқланган.
Аниқланган қоидабузарликлар бўйича белгиланган тартибда кўрсатмалар берилди. Бундан ташқари, лицензия талабларига риоя этилганлигини кўриб чиқиш масаласи юзасидан ваколатли органга сўровлар юборилди.
Рақобат қўмитаси фармацевтика соҳасида дори воситалари учун белгиланган нархларга риоя этилишини назорат қилиш мақсадида «яширин харидор» тадбирларини ўтказишни давом эттиришини маълум қилди.
