Ўзбекистон банклари соф фойдаси 2,2 баробар ошди

Тошкент, Ўзбекистон (UzDaily.uz) — Ўзбекистон банк тизимининг соф фойдаси 2025 йил якунларига кўра 15,5 трлн сўмни ташкил этди ва 2024 йилга нисбатан 2,2 баробарга ошди. Бу ҳақда июль ойида эълон қилинган Марказий банкнинг молиявий барқарорлик шарҳида маълум қилинган.

Банкларнинг капитал рентабеллиги (ROE) бир йил давомида 5,8 фоиз пунктга ошди ва 2026 йил 1 январь ҳолатига кўра 12,4 фоизга етди.

Активлар рентабеллиги (ROA) эса 0,8 фоиз пунктга ўсиб, 2,2 фоизни ташкил қилди. Ўсишга 11 фоизга кўпайган соф фоизли даромадлар ҳамда 39 фоизга ошган фоизсиз даромадлар ҳисса қўшди.

Кредит портфели сифати ҳам яхшиланди. Муаммоли кредитлар (NPL) ҳажми бир йил ичида 15 фоизга қисқариб, 18,1 трлн сўмга тушди. Уларнинг жами кредит портфелидаги улуши эса 1 фоиз пунктга камайиб, 3 фоизни ташкил қилди.

Ушбу кўрсаткич бўйича Ўзбекистон юқори даромадли давлатлар ҳисобга олинмаган Европа ва Марказий Осиё мамлакатлари медиана даражасига яқинлашди. Муаммоли кредитларни захиралар билан қоплаш коэффициенти 7 фоиз пунктга ошиб, 53 фоизга етди.

Захиралар чиқариб ташланганидан кейинги муаммоли кредитларнинг банклар регулятив капиталига нисбати 10 фоиздан 6 фоизгача пасайди. Марказий банк бу ҳолатни эҳтимолий кредит йўқотишларига нисбатан тизим барқарорлигининг ошиши сифатида баҳоламоқда.

Ликвидлик кўрсаткичлари ҳам яхшиланди. Банклар жами активларида юқори ликвидли активлар улуши 21 фоизга етди ва бир йил давомида 4 фоиз пунктга ошди. Бундай активлар ҳажми эса 42 фоизга кўпайди. Бу, аввало, давлат қимматли қоғозларига инвестициялар ҳажмининг 81 фоизга ва Марказий банкдаги ҳисобварақлардаги маблағларнинг 27 фоизга ошиши ҳисобига таъминланди.

2025 йилда банк тизимининг молиявий стресс индекси тарихий минимал даражага тушди. Регулятор буни ички валюта ва пул бозорларидаги барқарор вазият билан изоҳламоқда.

Марказий банк молиявий барқарорлик шарҳини йилда икки марта эълон қилади. Жорий ҳисобот 2026 йил 1 январь ҳолатидаги маълумотлар асосида тайёрланган.