Олмалиқда ЙТҲда бола ҳалок бўлди, иккинчиси шифохонада

Тошкент, Ўзбекистон (UzDaily.uz) — Тошкент вилояти Олмалиқ шаҳрида 12 май куни соат 14:00 атрофида йўл-транспорт ҳодисаси содир бўлди, оқибатда бир бола ҳалок бўлди, яна бир бола жароҳат олиб шифохонага ётқизилди. Бу ҳақда расмий манбалар хабар қилди.

Маълумотларга кўра, ҳодиса А. Темур кўчасида юз берган бўлиб, 23 ёшли ҳайдовчи 2017 йилда туғилган икки болани уриб юборган. Улар йўлнинг пиёдалар ўтиш қисми орқали кесиб ўтаётган бўлган.

Оқибатда жабрланган болалардан бири оғир жароҳат олиб, тиббиёт муассасасида вафот этган.

Иккинчи бола шифохонага етказилган, унинг ҳолати аниқланмоқда.

ЙТҲ бўйича жиноят иши қўзғатилган, ҳодиса ҳолатлари бўйича тергов олиб борилмоқда.