Тошкент, Ўзбекистон (UzDaily.uz) — «ЎзНИФ»нинг 2026 йилнинг тўққиз ойи якунлари бўйича соф фойдаси ўтган йилнинг шу даврига нисбатан 14,8 бараварга ошиб, 1,9 трлн сўмни ташкил этди.
Январь–сентябрь ойларида операцион фойда 2,5 трлн сўмга етди. Бу бир йил аввалги кўрсаткичдан 1375 фоизга кўп.
Ҳисобот даврида улушли инструментларга киритилган инвестициялардан олинган соф реализация қилинмаган фойда 2,1 трлн сўмни ташкил қилди.
Дивидендлардан олинган ялпи даромад 107,6 фоизга ўсиб, 356,3 млрд сўмга етди.
Айни вақтда операцион харажатлар ҳам ошди. Тўққиз ой давомида улар 8,7 бараварга — 32,3 млрд сўмдан 282,8 млрд сўмгача кўпайди.
Тўққиз ой якунларига кўра, «ЎзНИФ» активлари 32,2 трлн сўмни, капитали 31,5 трлн сўмни, реализация қилинмаган фойдаси эса 3,3 трлн сўмни ташкил этди. Материалда ушбу кўрсаткичларнинг ўтган йилги қиёсий маълумотлари келтирилмаган.
