Тошкент, Ўзбекистон (UzDaily.uz) — Ўзбекистон Республикаси Иқтисодиёт ва молия вазирлиги ҳамда Барқарор ривожланиш бўйича ечимлар тармоғи (SDSN) ҳамкорлик тўғрисидаги қўшма декларацияни имзолади.
2026 йил 19 октябрь куни Тошкентда ўтказилган семинар доирасида имзоланган ҳужжат SDSNнинг мамлакатда расмий фаолиятини бошлаши ва Барқарор ривожланиш мақсадларига (БРМ) эришиш борасида узоқ муддатли ҳамкорликни йўлга қўйиш учун асос яратади. Бу ҳақда Ўзбекистон Республикаси Иқтисодиёт ва молия вазирлиги ахборот хизмати хабар берди.
Семинарда тегишли вазирлик ва идоралар, халқаро ташкилотлар, ривожланиш бўйича ҳамкорлар ва барқарор ривожланиш соҳасидаги экспертлар иштирок этди. Иштирокчилар Ўзбекистоннинг БРМга эришиш борасидаги натижаларини, миллий ва халқаро мониторингни такомиллаштириш ёндашувларини, шунингдек, кўрсаткичларни ҳудудлар кесимида таҳлил қилиш усулларини кўриб чиқдилар.
Декларациянинг имзоланиши халқаро экспертлар билан ҳамкорликни мустаҳкамлаш, SDSNнинг илмий ва экспертлик салоҳиятидан фойдаланишни таъминлаш ҳамда халқаро методикаларни миллий амалиётга жорий этишга кўмаклашишга қаратилган.
Семинар давомида SDSN мутахассислари Барқарор ривожланиш мақсадлари индекси (SDG Index) методологиясини тақдим этдилар. Жумладан, улар кўрсаткичларни танлаш ва баҳолаш, маълумотларни нормаллаштириш ва умумлаштириш, шунингдек, мақсадларга эришиш динамикасини кузатиб бориш тамойиллари ҳақида маълумот бердилар.
Ўзбекистоннинг миллий ва минтақавий кўрсаткичларини ўзаро таққослаш ҳамда мавжуд маълумотлардан янада самарали фойдаланиш масалаларига алоҳида эътибор қаратилди.
Иштирокчилар, шунингдек, БРМ мониторингида географик ахборот тизимлари ва Ерни масофадан зондлаш технологияларини қўллашни муҳокама қилдилар. Бунда ерлар деградациясини баҳолаш бўйича халқаро ёндашувлар ҳам кўриб чиқилди.
Муҳокамаларнинг яна бир йўналиши барқарор ривожланиш бўйича ҳисоботларни тайёрлаш масалалари бўлди.
Экспертлар БРМ бажарилишини баҳолашнинг миллий тизимини халқаро ёндашувлар билан мувофиқлаштириш ва ҳудудлар даражасида маълумотлар сифатини ошириш масалаларини кўриб чиқдилар.
SDSN делегациясининг ташрифи доирасидаги семинар ва бошқа тадбирлар халқаро ҳамкорликни ривожлантириш ҳамда Ўзбекистоннинг Барқарор ривожланиш мақсадларига эришиш борасидаги тараққиётини баҳолаш воситаларини такомиллаштиришга қаратилган.
