Ўзбекистонга Ироқнинг 150 нафар тадбиркоридан иборат делегация келди

Тошкент, Ўзбекистон (UzDaily.uz) — Савдо-саноат палатаси ҳамда мамлакатимизнинг Кувайтдаги элчихонаси ташаббуси билан 150 га яқин Ироқ тадбиркорларидан иборат делегация Ўзбекистонга етиб келди.

Делегация таркибидан, шунингдек, Ироқ Савдо вазири Асир Довуд Салмон ал-Ғурайрий, Иқтисодий кенгаши раиси Иброҳим ал-Бағдодий, Инвестициялар миллий қўмитаси раиси ўринбосари Салар Муҳаммад Амин ўрин олган.

Ташриф доирасида мазмунли бизнес дастур режалаштирилган.

Меҳмонлар Тошкент ва Самарқанддаги бизнес-форумларда иштирок этишади, электротехника ва озиқ-овқат саноати кўргазмаларини кўриб чиқишади, қурилиш материаллари ва мебел шоу-румлари билан танишишади, шунингдек мамлакат фармацевтика кластери билан ҳам танишадилар.

Ташриф тадбиркорлар ўртасида тўғридан-тўғри алоқаларни ўрнатиш ва иқтисодиётнинг устувор соҳаларида ҳамкорликдаги лойиҳалар имкониятларини муҳокама қилиш учун самарали платформа бўлиши кутилмоқда.