Ўзбекистонда 5,5 миллиондан ортиқ ўзини ўзи банд қилган фуқаро рўйхатдан ўтди
Тошкент, Ўзбекистон (UzDaily.uz) — 2025 йил 1 июль ҳолатига кўра, Ўзбекистонда 5,5 миллиондан зиёд ўзини ўзи банд қилган фуқаро рўйхатдан ўтган. Бу ўтган йилнинг шу даврига нисбатан 56% га кўп. Бу ҳақда Давлат солиқ қўмитаси маълум қилди.
Энг кўп ўзини ўзи банд қилганлар — 2,2 миллион нафардан ортиқ фуқаро — маиший хизмат кўрсатиш соҳасида фаолият юритмоқда. Шунингдек, 1,5 миллионга яқин киши қишлоқ хўжалигида ишламоқда.
2025 йил бошидан буён такси хизматлари кўрсатувчи ўзини ўзи банд қилганлар сони кескин ўсиб, 184,2 минг нафарга кўпайди ва жами 777,1 минг нафарга етди.
Энг тез ўсиш ахборот ва коммуникация технологиялари соҳасида кузатилмоқда. Бу йўналишда бир йил ичида ўзини ўзи банд қилганлар сони 92,3% га кўпайиб, 168,2 минг нафарга етди.
Ҳудудлар кесимида эса энг кўп ўзини ўзи банд қилганлар Самарқанд вилоятида рўйхатдан ўтган — 593,2 минг киши. Иккинчи ўринда Тошкент шаҳри — 584,6 минг, учинчи ўринда Тошкент вилояти — 538,8 минг ўзини ўзи банд қилган фуқаро қайд этилган.
