Тошкент, Ўзбекистон (UzDaily.uz) — Тошкент вилоятида ёшларни Японияда ишга жойлашишга тайёрлаш бўйича ўқув марказини ташкил этиш масаласи муҳокама қилинди. Ушбу ташаббус Япониянинг Onodera User Run Co., Ltd. компанияси билан ҳамкорликда кўриб чиқилмоқда.
Ўзбекистон Президенти Шавкат Мирзиёев топшириқларини амалга ошириш доирасида Тошкент вилояти ҳокимининг биринчи ўринбосари Отабек Турсунов, Янгийўл шаҳри ҳокими Равшан Раимов ва Япония компанияси вакиллари Янгийўлдаги 1-сонли техникумга ташриф буюрди.
Ташриф давлат раҳбари «Интил» халқаро тил ва касб-ҳунарга ўқитиш маркази (Intil) фаолияти билан танишгани ҳамда меҳнат миграцияси масалалари бўйича ўтказилган йиғилишдан сўнг ташкил этилди. Йиғилиш якунлари бўйича мамлакат ҳудудларида ягона миграция марказларини ташкил этиш вазифалари белгиланган эди.
Таклифлардан бири Янгийўл техникуми базасида ихтисослаштирилган ўқув марказини очишдан иборат. Унда ёшларга япон тилини ўргатиш, шунингдек, Японияда ишга жойлашиш учун талаб этиладиган B, C ва D тоифали ҳайдовчилик гувоҳномаларини олишга тайёрлаш режалаштирилган.
Ташриф иштирокчилари техникумнинг моддий-техник базаси, таълим олиш учун яратилган шароитлар ва япон ҳамкорлари иштирокида ўқув жараёнини ташкил этиш имкониятларини ҳам баҳолади.
Кутилишича, лойиҳа ёшларнинг касбий тайёргарликдан ўтиш ва хорижий тилларни ўрганиш имкониятларини кенгайтиради, шунингдек, халқаро меҳнат бозори учун кадрлар захирасини шакллантиришга ёрдам беради.
Ташаббус Ўзбекистон фуқароларининг хорижда қонуний меҳнат фаолияти билан шуғулланиши учун қўшимча имкониятлар яратишга қаратилган.
