Ўзбекистон ва Япония геология соҳасида ҳамкорликни муҳокама қилди

Тошкент, Ўзбекистон (UzDaily.uz) — Ўзбекистон Тоғ-кон саноати ва геология вазирлиги вакиллари Япониянинг ITOCHU ва JOGMEC компаниялари, шунингдек, Япония Иқтисодиёт, савдо ва саноат вазирлиги (METI) вакиллари билан учрашув ўтказди. Учрашув вазирнинг биринчи ўринбосари Феруза Ҳамидова раҳбарлигида бўлиб ўтди. Бу ҳақда Ўзбекистон Тоғ-кон саноати ва геология вазирлиги хабар берди.

Музокаралар давомида Япония томони Ўзбекистон ва Япония ўртасидаги стратегик шерикликнинг аҳамиятини таъкидлаб, геология ва тоғ-кон-металлургия саноати соҳаларида ҳамкорликни янада ривожлантиришдан манфаатдор эканини билдирди.

Ўзбекистон вазирлиги вакиллари ITOCHU, JOGMEC ва бошқа Япония компанияларини мамлакат ҳудудидаги истиқболли участкаларни ўзлаштиришга жалб этишга тайёр эканини маълум қилди.

Шунингдек, томонлар тегишли лойиҳаларга Япония инвестицияларини жалб қилиш имкониятларини муҳокама қилди. Ўзбекистон Тоғ-кон саноати ва геология вазирлиги ушбу соҳадаги лойиҳаларни амалга ошириш жараёнида япон инвесторларига зарур кўмак ва ёрдам кўрсатишга тайёрлигини билдирди.

Учрашув якунлари бўйича томонлар геология ҳамда тоғ-кон-металлургия саноати соҳаларида амалий ҳамкорликни янада ривожлантиришдан манфаатдор эканини тасдиқлади.