Тошкентда тақиқланган моддалар олиб кирилишининг икки ҳолати аниқланди

Тошкент, Ўзбекистон (UzDaily.uz) — Ўзбекистонда тақиқланган моддаларни ноқонуний равишда олиб кириш ва ташиш билан боғлиқ икки ҳолатнинг олди олинди. Тошкент халқаро аэропортида Уртачирчиқ туманида яшовчи, муқаддам судланган 24 ёшли фуқаро ушланган. Тергов маълумотларига кўра, у Бангкокдан психотроп моддаларни озиқ-овқат маҳсулотлари ниқоби остида Ўзбекистонга олиб киришга уринган. Бу ҳақда Ўзбекистон Давлат хавфсизлик хизмати матбуот хизмати хабар берди.

Текширув вақтида ушланган шахсдан 978 грамм каннабис мойи ва таркибида психоактив модда бўлган қарийб 500 грамм қўзиқорин мусодара қилинган. ДХХ маълумотларига кўра, у олиб кирилган моддаларни сотишни режалаштирган.

Яна бир ҳолат Тошкент вилоятида Damas автомашинаси текширилган вақтда аниқланган. Ҳуқуқни муҳофаза қилувчи органлар сибутрамин моддаси мавжуд бўлган 12 992 қути қаҳва маҳсулотини аниқлаган.

Маҳсулот Учтепа тумани ва Фарғона вилояти Олтиариқ туманида яшовчи 39 ва 37 ёшли икки нафар эркакка тегишли бўлган. Ведомство маълумотларига кўра, улар маҳсулотни қўшни давлатдан олиб кирган ва Фарғона вилояти ҳудудида сотишни режалаштирган.

Ҳар икки ҳолат бўйича жиноят ишлари қўзғатилган. Тергов ҳаракатлари давом этмоқда.