Ўзбекистонда Умра сафарларини ноқонуний ташкил этиш ҳолатлари аниқланди

Тошкент, Ўзбекистон (UzDaily.uz) — Ўзбекистонда фуқароларнинг «Умра» зиёратига сафарларини ноқонуний ташкил этиш билан боғлиқ икки ҳолат аниқланди. Тошкент ва Фарғонада фуқароларга пул эвазига Саудия Арабистонига сафар уюштиришни ваъда қилган эркаклар ушланди. Бу ҳақда Ўзбекистон Республикаси Давлат хавфсизлик хизмати матбуот хизмати хабар берди.

Тошкентда 45 ёшли эркак ўзини Умра сафарларини ташкил этиш учун рухсатномага эга туристик компания ходими сифатида таништирган. У уч нафар фуқарога Саудия Арабистонига сафар уюштириш ва барча диний маросимларни адо этишни таъминлашни таклиф қилган.

Ўз хизматлари учун эркак жами 3 450 доллар талаб қилган. У 3 400 доллар ва 600 минг сўмни олаётган вақтда ушланган.

Шунга ўхшаш ҳолат Фарғонада ҳам аниқланган. 28 ёшли эркак танишлари орқали тўрт нафар фуқарога Умра сафари уюштиришни таклиф қилган. Бунинг учун у 4 200 доллар талаб қилган ва пулни олаётган вақтда ушланган.

Ҳар икки ҳолат бўйича жиноят ишлари қўзғатилган. Ҳозирда тергов ҳаракатлари давом этмоқда.