Тошкент, Ўзбекистон (UzDaily.uz) — Ўзбекистон адлия вазири Акбар Тошқулов ва Туркия адлия вазири Акин Гюрлек ҳуқуқий соҳадаги икки томонлама ҳамкорликни ривожлантириш масалаларини муҳокама қилди.
Учрашув Туркий давлатлар ташкилоти Адлия вазирлари кенгашининг учинчи йиғилиши доирасида Истанбул шаҳрида бўлиб ўтди.
Томонлар икки мамлакат ўртасида адлия ва суд-ҳуқуқ тизими соҳаларидаги ҳамкорликнинг жорий ҳолатини, шунингдек, ўзаро ҳамкорликни янада ривожлантириш йўналишларини кўриб чиқди.
2026–2027 йилларга мўлжалланган Ҳамкорлик дастурини амалга ошириш масалаларига алоҳида эътибор қаратилди.
Музокараларнинг асосий мавзулари қаторида медиация ва низоларни ҳал этишнинг муқобил усулларини ривожлантириш, адвокатура фаолияти, давлат ҳисобидан юридик ёрдам кўрсатиш, ҳуқуқшунос мутахассисларни тайёрлаш ва уларнинг малакасини ошириш, шунингдек, ҳуқуқий ахборот соҳасидаги ҳамкорлик масалалари ўрин олди.
Учрашув иштирокчилари медиация ва низоларни муқобил ҳал этиш (ADR) соҳасида тажриба алмашишни кенгайтириш имкониятларини ҳам муҳокама қилди. Хусусан, медиаторларни тайёрлаш, судга мурожаат қилишдан олдин ва суд жараёнида тегишли механизмлардан фойдаланиш, шунингдек, тизимни рақамлаштириш масалалари кўриб чиқилди.
Ҳамкорликнинг алоҳида йўналиши сифатида Ўзбекистон Адлия вазирлиги ҳузуридаги Юридик кадрларни қайта тайёрлаш ва малакасини ошириш институти ҳамда Туркия Адлия академияси ўртасидаги алоқалар белгиланди.
Томонлар ўзаро ўқув ташрифлари ва стажировкаларни ташкил этиш, шунингдек, қўшма семинарлар ўтказиш имкониятларини кўриб чиқди.
Учрашув якунида вазирлар идоралар ўртасидаги амалий ҳамкорликни мустаҳкамлаш, тажриба алмашишни кенгайтириш ва қўшма ташаббусларни изчил амалга оширишни давом эттиришга келишиб олди.
