7
Иқтисод

Ўзбекистон ва Ўмон савдо ҳамда инвестицияларни кенгайтиришни муҳокама қилди

Ўзбекистон ва Ўмон савдо ҳамда инвестицияларни кенгайтиришни муҳокама қилди
Ўзбекистон ва Ўмон савдо ҳамда инвестицияларни кенгайтиришни муҳокама қилди / Фото: Инвестициялар, саноат ва савдо вазирлиги матбуот хизмати.

Тошкент, Ўзбекистон (UzDaily.uz) — Ўзбекистон ва Ўмон Масқат шаҳрида бўлиб ўтган Ҳукуматлараро комиссиянинг олтинчи йиғилишида ўзаро савдо, инвестициявий ҳамкорлик ва транспорт алоқаларини кенгайтириш масалаларини муҳокама қилди. Бу ҳақда Ўзбекистон Инвестициялар, саноат ва савдо вазирлиги хабар берди.

Йиғилиш 2026 йил 15 ноябрь куни Ўзбекистон Президенти Шавкат Мирзиёевнинг Ўмонга давлат ташрифи доирасида бўлиб ўтди.

Комиссияга Ўзбекистон инвестициялар, саноат ва савдо вазири Лазиз Қудратов ҳамда Ўмон савдо, саноат ва инвестицияларни рағбатлантириш вазири Анвар бин Ҳилол ал-Жабрий ҳамраислик қилди.

Томонлар ўзаро савдо ҳажмини ошириш чораларини кўриб чиқди. Устувор йўналишлар қаторида преференциал савдо тўғрисидаги битимни тайёрлаш, техник тўсиқларни бартараф этиш ва божхона тартиб-таомилларини соддалаштириш масалалари белгиланди.

Инвестиция лойиҳалари ва ҳамкорликнинг янги йўналишлари

Йиғилиш иштирокчилари Ўзбекистон — Ўмон инвестиция компанияси фаолиятини ривожлантириш масаласини муҳокама қилди. Шунингдек, энергетика, саноат, геология, қурилиш, қишлоқ хўжалиги ва рақамли технологиялар соҳаларидаги қўшма ташаббуслар кўриб чиқилди.

Ўзбекистон маҳсулотларини янги бозорларга олиб чиқишда Ўмон порт инфратузилмасидан фойдаланиш масаласига алоҳида эътибор қаратилди.

Томонлар логистика ва юк авиақатновларини ривожлантириш масалаларини ҳам муҳокама қилди.

Йиғилиш якунида баённома имзоланди. Ҳукуматлараро комиссиянинг навбатдаги йиғилишини Ўзбекистонда ўтказиш режалаштирилган.

 

 

Дилафруз Ниязова
Дилафруз Ниязова

Дилафруз Ниязова 2025 йилдан буён UzDaily жамоасида фаолият юритиб, нашрнинг ўзбек тилидаги версияси учун масъулдир.