Тошкент, Ўзбекистон (UzDaily.uz) — Ўзбекистон Республикаси Ташқи ишлар вазири Бахтиёр Саидов “Марказий Осиё — Форс кўрфази араб давлатлари ҳамкорлик кенгаши” (ФКАДХК) доирасида ташқи ишлар вазирларининг учинчи йиғилишида иштирок этди.

«Ташкил этилган мазкур муҳим анжуман учун самимий меҳмондўстлик ва мукаммал ташкилотчиликка миннатдорлик билдирамиз. Қатнашган учрашувимиз давомида энг долзарб масалалар муҳокама қилинди, шунингдек, ривожланиб бораётган шериклик муносабатларимизни янада мустаҳкамлаш ва кенгайтириш бўйича самарали ёндашувлар ишлаб чиқилди», — дея таъкидлади Бахтиёр Саидов ўзининг Telegram-каналида.

Шунингдек, вазир 5 май куни бўлиб ўтадиган Самарқанд саммити аҳамиятига алоҳида тўхталиб, уни Марказий Осиё ва Форс кўрфази давлатлари ўртасидаги ҳамкорликни чуқурлаштириш йўлида муҳим босқич, дея атади.

«Биз умумий қадриятлар, стратегик салоҳият ва ўхшаш қарашларга эга бўлган ҳолда, минтақаларимиз ўртасидаги ҳамкорлик тарихи янги босқичга қадам қўяётганини намоён этяпмиз», — дея хулоса қилди Ўзбекистон ташқи сиёсий идораси раҳбари.