Ўзбекистон тажрибаси One Health конгрессида муҳокама қилинди
Тошкент, Ўзбекистон (UzDaily.uz) — Лиссабонда бўлиб ўтаётган One Health 9-жаҳон конгрессида Ўзбекистон тажрибаси муҳокама қилинмоқда. Алоҳида сессияда иштирокчилар Ўзбекистон, Сингапур ва Малавининг «Ягона саломатлик» соҳасида миллий режаларни амалга ошириш бўйича тажрибасини кўриб чиқмоқда.
One Health ёндашуви инсонлар, ҳайвонлар ва ўсимликлар саломатлиги, шунингдек, атроф-муҳит ҳолатини ягона тизимнинг ўзаро боғлиқ элементлари сифатида комплекс равишда кўриб чиқишни назарда тутади. Бундай ёндашувга эҳтиёж инсон саломатлигига таҳдид солувчи кўплаб омилларни биргина соҳа доирасида самарали ҳал этиб бўлмаслиги билан боғлиқ.
Бунга қушлар орасида вирусларнинг тарқалиши мисол қилиб келтирилмоқда. Унинг оқибатлари паррандачилик соҳаси доирасидан ташқарига чиқиши мумкин. Антибиотикларга чидамлилик билан боғлиқ вазият ҳам шунга ўхшаш бўлиб, у бир вақтнинг ўзида соғлиқни сақлаш ва ветеринария тизимларига таъсир қилади.
Бундан ташқари, иқлим ўзгариши, биологик хилма-хилликнинг қисқариши ва атроф-муҳит деградацияси бир вақтнинг ўзида инсонлар, ҳайвонлар ва ўсимликлар саломатлигига таъсир кўрсатмоқда.
Шу муносабат билан One Health концепциясига халқаро эътибор кучайиб бормоқда. Лиссабонда ўтаётган конгрессда асосий урғу ушбу ёндашувни қўллаш зарурлиги ҳақидаги умумий баёнотлардан амалий чора-тадбирларга ўтишга қаратилган.
«Ягона саломатлик» тамойилларини амалга ошириш ветеринария хизматлари, соғлиқни сақлаш тизими, ўсимликларни ҳимоя қилиш ва карантин органлари, экологик тузилмалар, илмий муассасалар, бизнес ва жамоатчилик ўртасидаги ҳамкорликни назарда тутади.
Халқаро сессия доирасида Ўзбекистон тажрибасининг муҳокама қилиниши мамлакатда инсонлар, ҳайвонлар ва ўсимликлар саломатлиги, шунингдек, атроф-муҳит ҳолати билан боғлиқ хавфларни комплекс бошқариш масалаларига халқаро ҳамжамият эътибори қаратилаётганини кўрсатади.
